Ռուսաստանի Պետդումայում օրինագծերի փաթեթ է ներկայացվել, ըստ որի արտերկրից ֆինանսավորում ստացող լրատվամիջոցները պետք է այդ մասին տեղյակ պահեն «Ռոսկոմնադզոր»-ին: Նախագիծը խորհրդարանի օրակարգում ընդգրկվել է հոկտեմբերի 6-ի երեկոյան, հաղորդում է «Կոմերսանտը»:
Եթե լրատվամիջոցները 30 օրվա ընթացքում չփոխանցեն պահանջվող տվյալները, կտուգանվեն ստացված արտասահմանյան միջոցների չափով: Մի քանի խախտումից հետո լրատվամիջոցը կարող է փակվել:
Օրինագծի հեղինակները կարծում են, որ նոր արգելքը կբարձրացնի Ռուսաստանում տեղեկատվական անվտանգության աստիճանը:
«Մի շարք երկրներում ռուսական լրատվամիջոցների նկատմամբ ճնշման աճի պայմաններում, փորձ է արվում տնտեսական ազդեցությամբ, ռեպրեսիվ գործողությունների եւ, այսպես կոչված, «արդարադատության մարմինների որոշումների» օգնությամբ սահմանափակել կամ դադարեցնել ռուսական լրատվամիջոցների աշխատանքն այդ երկրներում»,-ասված է օրինագծին կից գրության մեջ:
Հեղինակները հայտարարում են, որ օտարերկրյա կազմակերպությունները ռուսական լրատվամիջոցների դրամաշնորհներ են տրամադրում, որի նպատակը «կանխակալ տեղեկատվությունն է եւ քաղաքական իրականության խեղաթյուրված պատկերի ստեղծումը»: