Դոնեցկի մոտ խոցված Boing-777 օդանավի ուղեւորների մարմինների մեջ «Բուկ» հրթիռի բեկորներ են հայտնաբերել։ Նմանատիպ բեկորներ են գտել նաեւ օդանավի թեւի մնացորդների մեջ։ Այս մասին գրում է նիդերլանդական NOS պարբերականը՝ վկայակոչելով Ուկրաինայի ազգային անվտանգության ծառայության հետաքննությունների բաժնի պետ Վասիլի Վովկին, որը ավիաաղետի պատճառները հետաքննող միջազգային քննիչների խմբի անդամներից է։ Փորձաքննության համար Ուկրաինան քննիչներին առաջարկել է «Բուկ» հրթիռից 2 նմուշ վերցնել, գրում է պարբերականը։
Հոլանդացի, ավստրալացի եւ ուկրաինացի փորձագետները քանդել են արկերից մեկը եւ համեմատական անալիզ անցկացրել ուղեւորների մարմինների միջից ու օդանավի թեւից հանած բեկորների հետ։
Անալիզը թույլ է տվել հաստատել, որ օդանավը խոցվել է հենց «Բուկ» զենիթահրթիռային համակարգի միջոցով, փոխանցում է Lenta.ru-ն։
Հիշեցնենք, որ Malaysia Airlines ավիաընկերության Boing-777 օդանավը կործանվել էր 2014թ. հուլիսի 17-ին Դոնեցկի մոտ։ Վթարից զոհվել էր 298 մարդ։ Մինչ օրս ոչ ոք չի ստանձնել միջադեպի պատասխանատվությունը։