Նոյեմբերի 1-ին կայանալիք խորհրդարանական արտահերթ ընտրություններից հետո Թուրքիայում հնարավոր է ներքին պատերազմ սկսվի: NEWS.am-ի թղթակցի հետ զրույցում նման կարծիք հայտնեց Թուրքիայի պատմության հիմնադրամի ներկայացուցիչ Մեսութ Յաշար Թուֆանը:
«Չեմ կարող հստակ ասել, թե ինչ ընթացք կունենան խորհրդարանական ընտրությունները եւ ինչ կլինի ապագայում: Մի բան հստակ է. Թուրքիայում քրդական շրջաններում դժվար կլինի ընտրություններ անցկացնել, քանի որ բախումներ են տեղի ունենում: Մանավանդ այն շրջաններում են ռազմական գործողություններ կատարվում, որտեղ քրդական «Ժողովուրդների դեմոկրատական» (HDP) կուսակցությունը ամենաշատ ձայներն է հավաքել»,- ասաց Մեսութ Թուֆանը:
Թուրք պատմաբանի կարծիքով՝ եթե քրդական կուսակցությունն իր նախընտրած ձայները չհավաքի, երկրում ռազմական գործողությունները կշարունակվեն. «Չի բացառվում նույնիսկ, որ ներքին պատերազմ սկսվի»:
Հիշեցնենք, որ Թուրքիայում նոյեմբերի 1-ին կանցկացվեն խորհրդարանական արտահերթ ընտրություններ, քանի որ հունիսի 7-ին կայացած ընտրություններից հետո հնարավոր չի եղել ձեւավորել կոալիցիոն կառավարություն: