Մարզական մրցումների ելքը կանխագուշակելու հայտնի ամերիկացի մասնագետ Ռաֆայել Էսպարսան (Լաս Վեգասի Doc's Sports Serv բուքմեյքերական ընկերությունից) գնահատել է տարբեր երկրների եւ մասնավոր կազմակերպությունների շանսերը Մարսում մարդու հաջող վայրէջք իրականացնելու գործում։

Ամենից բարձր նա գնահատել է Space X ընկերության շանսերը՝ հինգը մեկի։ Իլոն Մասկի նախագծին Մարսի վրա հայտնվել կօգնի այն, որ նա մեծ ցանկություն եւ ֆինանսական ռեսուրսներ ունի։

Էսպարսան Ռուսաստանի հաջողության հնարավորությունը եւս բարձր է գնահատել՝ 60-ը մեկին։ Հնարավոր է, որ դա պայմանավորված է «Ռոսկոսմոսի» ծրագրերով՝ գերծանր հրթիռ թողարկել, որը պիտանի կլինի մարդու կողմից կառավարվող տիեզերանավ  Մարս ուղարկելու համար։ «Ակնհայտ է, որ Պուտինը լրջորեն է տրամադրված», - նշում է Էսպարսան, հաղորդում է Lenta.ru-ն։

Մարզական փորձագետի կանխագուշակումները կասկածներ են առաջացնում, որովհետեւ Չինաստանին եւ Եվրոպայի տիեզերական գործակալությանը (մարսյան մրցարշավի «ուշացող» մասնակիցներին) նա նվազագույն շանսեր է տալիս՝ 100-ը մեկին եւ 300-ը՝ մեկին։ Նույնիսկ ավելի ցածր, քան Mars One-ի շանսերը՝ ոչ առեւտրական նախագծի, որը շատերը խարդախ հորինվածք են համարում։

Իմիջիայլոց, Էսպարսան հատուկ պարզաբանել է, որ ՆԱՍԱ-ն անվիճելի ֆավորիտ կհամարվեր, եթե չլինեին տիեզերական գործակալության բյուջեի մշտական կրճատումները։