Սահմանադրության փոփոխությունները լայն հնարավորություններ են ընձեռում ընդդիմադիր ուժերին։ Այսօր՝ հոկտեմբերի 7-ին, լրագրողների հետ զրույցում նշել է ԱԺ ՀՀԿ խմբակցության պատգամավոր Սուքիաս Ավետիսյանը։

«Առաջին անգամ մենք հիմնական ինստիտուտների ղեկավարներին ընտրելու ենք 3/5 մեծամասնությամբ, ինչը նշանակում է՝ մարդն ընտրվելու է նաեւ ընդդիմության կողմից։ Չեմ կարծում, որ 3/5 մեծամասնություն որեւէ կուսակցություն կամ կոալիցիոն ուժ կարողանա ունենալ»,- ասաց Սուքիաս Ավետիսյանը։

Մինչդեռ հրապարակախոս Կարինե Հակոբյանը կարծում է, որ նոր Սահմանադրությունը հնարավորություններ չի ընձեռում ընդդիմությանը․ «Մեր խնդիրներից մեկը ընդդիմություն չունենալն է։ Քաղաքական համակարգն այնպես է ստեղծված, որ չունենանք քաղաքական ընդդիմություն։ Մենք այս հարցը լուծելու փոխարեն ընդդիմությանը ոչնչացնում ենք՝ կայուն մեծամասնության ինստիտուտը ներդնելով»։

Ավելի վաղ հայտնել էինք, որ հոկտեմբերի 5-ին նոր Սահմանադրության նախագիծն ընդունվել է 104 կողմ, 10 դեմ եւ 3 ձեռնպահ ձայներով։ Հիշեցնենք, որ Սահմանադրության նախագիծը նախատեսում է անցում կատարել կառավարման խորհրդարանական համակարգին։