Բնական է, որ որոշ քաղաքական ուժերի եւ անձանց պետք է հիասթափեցներ փաստը, որ հոկտեմբերի 5-ին ԱԺ-ում նոր Սահմանադրության նախագիծն ընդունվել է 104 ձայնով։ Այսօր՝ հոկտեմբերի 7-ին, լրագրողների հետ հանդիպմանը նման կարծիք հայտնեց ԱԺ ՀՀԿ խմբակցության պատգամավոր Սուքիաս Ավետիսյանը՝ անդրադառնալով ՀՀ երկրորդ նախագահի վերջին հարցազրույցին։
«Հոկտեմբերի 5-ին խորհրդարանում Սահմանադրության նախագիծն ընդունվեց 104 ձայնով՝ ի պատիվ Հանրապետության նախագահի, որը տարբեր ձեւաչափերով հանդիպումներ ունեցավ քաղաքական ուժերի հետ, եւ ի պատիվ մասնագիտական հանձնաժողովի, որի անդամները ցանկացած առաջարկություն փորձում էին անպատասխան չթողնել։ Ինքս բնական եմ համարում, որ 104 ձայնով անցնելուց հետո կլինեն նման խոսակցություններ»,- ասաց Սուքիաս Ավետիսյանը։
Հիշեցնենք, որ հոկտեմբերի 6-ին Հայաստանի երկրորդ նախագահ Ռոբերտ Քոչարյանը հարցազրույց է տվել, որում հայտարարել է, որ ինքը դեմ է Սահմանադրական փոփոխություններին։
Ավելի վաղ հայտնել էինք, որ հոկտեմբերի 5-ին նոր Սահմանադրության նախագիծն ընդունվել է 104 կողմ, 10 դեմ եւ 3 ձեռնպահ ձայներով։
