ՀՀ նախագահ Սերժ Սարգսյանն այսօր՝ հոկտեմբերի 7-ին, հեռախոսազրույց է ունեցել Ռուսաստանի Դաշնության Նախագահ Վլադիմիր Պուտինի հետ, շնորհավորել եւ բարեմաղթանքներ հղել նրան ծննդյան օրվա առթիվ: ՌԴ Նախագահին ՀՀ Նախագահը նաեւ շնորհավորական ուղերձ է հղել:
«Հարգարժա՛ն Վլադիմիր Վլադիմիրի,
Ընդունեք ամենաջերմ եւ սրտանց շնորհավորանքներս Ձեր ծննդյան օրվա առթիվ:
Ձեր երկարամյա պետական գործունեությամբ, հարուստ քաղաքական փորձով եւ ի շահ Ռուսաստանի բարգավաճման ու նրա քաղաքացիների բարեկեցության նախանշված նպատակներին հասնելու հետեւողականությամբ Դուք արժանացել եք Ձեր հայրենակիցների խորը հարգանքին եւ համաշխարհային ասպարեզում բարձր հեղինակության:
Հայաստանում բարձր են գնահատում Ձեր անձնական ներդրումը Հայաստանի եւ Ռուսաստանի դաշնակցային փոխգործակցության զարգացման գործում՝ հիմնված մեր երկրների ժողովուրդների բարեկամության, եղբայրության եւ փոխադարձ աջակցության վրա: Վստահ եմ, որ մեր համատեղ ջանքերը այսուհետ եւս ուղղված կլինեն միջպետական քաղաքական երկխոսության հետագա ընդլայնմանը, հայ-ռուսական համագործակցությունը ռազմավարական նախաձեռնություններով եւ առեւտրատնտեսական, հումանիտար ու այլ ոլորտներում հեռանկարային նախագծերով հետեւողականորեն լրացնելուն, ինչը բխում է մեր ժողովուրդների արմատական շահերից:
Վստահ եմ, որ հայ-ռուսական ռազմավարական գործընկերության ամրապնդումը ինտեգրացիոն գործընթացների շրջանակներում եւ բազմակողմ կառույցների ձեւաչափով կնպաստի տարածաշրջանային կայունության եւ անվտանգության ապահովմանն ուղղված համատեղ նպատակներին:
Հարգելի՛ Վլադիմիր Վլադիմիրի, սրտանց մաղթում եմ Ձեզ քաջառողջություն, երջանկություն, բարեկեցություն, նորանոր հաջողություններ բոլոր նախաձեռնություններում»,-ասված է ՀՀ նախագահի շնորհավորական ուղերձում:
