Հայկական եւ ադրբեջանական հասարակությունների խնդիրն այն է, որ նրանք իրենց երեխաներին մեծացնում են արդեն կոնկրետ ազգի հանդեպ ատելությամբ։ Այս մասին haqqin.az-ի հետ զրույցում ասել է մոսկվայաբնակ Շեւգի Ահադովը։ Ահադովի նկատմամբ ադրբեջանցիների շրջանում հետաքրքրություն էր առաջացել այն բանից հետո, երբ ուկրաինական Inter հեռուստաալիքով հեռարձակվող «Ծիծաղեցրու երգիծաբանին» հումորային հաղորդման ժամանակ հայտնվել էր Շեւգի Ահադով-Արայիկ Մանգասարյան դուետը։
«Արայիկին առաջին հերթին համարում եմ մարդ, հետո նոր հայ, ընկեր եւ այլն»,- ասել է Ահադովը։
«Եթե ես միայնակ ելույթ ունենայի «Ծիծաղեցրու երգիծաբանին» շոուում, ապա ոչ ոք այդ մասին անգամ չէր խոսի։ Կասեին՝ կեցցե մեր տղան, մեր հայրենակիցը, մեր հպարտությունը։ Որովհետեւ, ցավոք սրտի, տպավորություն է ստեղծվում, որ ադրբեջանցի ազգի մտածելակերպի մեջ նստած է ինչ-որ մեկին նվաստացնելու, բոլորից բարձր ու բոլորից հայրենասեր թվալու նպատակը։ Թե ես պետք է Արայիկի կոկորդը բեմի վրա կտրեի եւ դառնայի ազգային հերոս ազգի համար եւ խայտառակություն աշխարհի համար»,- ասել է Ահադովը՝ ակնարկելով տխրահռչակ Ռամիլ Սաֆարովին։
«Տարօրինակ է, թե ինչու աղմուկ չբարձրացավ Գարիկ Մարտիրոսյանի եւ «ԿՎՆ»-ի «Բաքվի տղաները» լեգենդար թիմի շուրջ։ Չէ՞ որ բեմից դուրս «Տղաների» բենեֆիսի ժամանակ ելույթ ունեցավ Գարիկ Մարտիրոսյանը եւ ելույթից հետո շնորհավորեց բոլորին՝ սեղմելով թիմի յուրաքանչյուր անդամի ձեռքը։ Ի՞նչ է ստացվում. Գարիկն ազգի դավաճա՞ն է։ Թե՞ «Բաքվի տղաները» պետք է վեր կենային եւ կտրեին Գարիկ Մարտիրոսյանի կոկորդն այն բանի համար, որ նա ՌԴ առաջին ալիքով իր ելույթը նվիրել էր նրանց»,- շարունակել է Ահադովը։
«Հայկական եւ ադրբեջանական հասարակությունների խնդիրն այն է, որ նրանք իրենց երեխաներին մեծացնում են ինչ-որ ազգի նկատմամբ ատելությամբ։ Մի՞թե դա ճիշտ է։ Մի՞թե մեր քաղաքական գործիչները չեն պնդում, որ Լեռնային Ղարաբաղի հայերը մեր քաղաքացիներն են, իսկ Բաքվում մինչեւ 30 հազար հայ է ապրում։ Բացառապես յուրաքանչյուր հակամարտություն ի վերջո խաղաղությամբ է ավարտվում։ Եվ ես կցանկանայի հարց հղել բոլորին. «Իմաստ կա՞ արդյոք կյանքից զրկել որդուն, եղբորը, հորեղբորը, ընտանիքի հորը եւ շարունակել դա անել եւս մի 300 տարի»,- եզրափակել է լրջմիտ երգիծաբանը։