Հայկական ԱԷԿ-ի վերակառուցման մրցույթում տեղական ընկերությունների մասնակցությունը ողջունելի է։ Այս մասին հոկտեմբերի 7-ին՝ Երեւանում ՀՀ էներգետիկայի նախարար Երվանդ Զախարյանի հետ համատեղ ճեպազրույցի ժամանակ, լրագրողներին հայտնել է «Ռոսատոմ» ռուսական պետական ընկերության ղեկավար Սերգեյ Կիրիենկոն։
«Ռոսատոմ»-ին պատկանող «Ռոսատոմ սերվիս» պետական ընկերության կայքում աշխատանքային գրաֆիկի եւ մրցույթների մասին մանրամասն տեղեկությունների բաժին է բացվել։ «Մենք շահագրգռված ենք, որպեսզի այդ աշխատանքներին առավելագույնս մասնակցեն նաեւ հայկական ընկերությունները»,- հավելել է նա։
Ռուսական ֆինանսավորման շրջանակներում արդեն ընդունվել են ավելի քան 2 մլն դոլար արժողությամբ աշխատանքների առաջին ակտերը։ Իսկ մինչեւ տարեվերջ պետք է ընդունվի 7 մլն։
«Պատվիրատուն, ի դեմս Մեծամորի ԱԷԿ-ի, գումար կստանա անհրաժեշտության դեպքում, որպեսզի ավելորդ գումար եւ դրա հետ մեկտեղ՝ ավելորդ տոկոսներ չվերցնի։ Անհրաժեշտ ֆինանսավորման հստակ թվեր դեռ չկան, դա կպարզվի աշխատանքների ընթացքում, պարզաբանել է Կիրիենկոն։
Հայկական ատոմակայանը շահագործման է հանձնվել 1976 թվականին: 1989-ին այն փակվել է, իսկ 1995 թվականին 407.5 ՄՎտ հզորությամբ երկրորդ էներգաբլոկը կրկին վերագործարկվել է: Հաշվի առնելով պարապուրդը՝ որոշում էր կայացվել շահագործման ժամկետները 2006թ.-ից երկարաձգել մինչեւ 2016թ.։ Նշենք, որ ԱԷԿ-ի շահագործման ժամկետը մինչեւ 2026 թվականը երկարաձգելու որոշումը Հայաստանի կառավարությունն ընդունել է 2013 թվականի սեպտեմբերի 13-ին:
