Բելգիայի հայ համայնքը վիրավորված է երկրի կառավարությունից, մասնավորապես, Արտաքին գործերի նախարարությունից, Թուրքիայի նախագահ Ռեջեփ Թայիփ Էրդողանի պետական այցը Բելգիա չեղյալ համարելու իրենց բազմաթիվ կոչերն անտեսելու համար։ Այս մասին NEWS.am-ի հետ զրույցում ասաց ՀՅԴ Եվրոպայի Հայ Դատի հանձնախմբի նախագահ Գասպար Կարապետյանը։
«Մենք եւ Բելգիայի մի խումբ խորհրդարանականներ մեկ շաբաթ առաջ դիմում-բողոքներ էինք ուղարկել վարչապետին եւ արտգործնախարարին, որպեսզի Էրդողանի այցը չիրակականա, սակայն այդպես էլ պատասխան չստացանք»,- ասաց ՀՅԴ Եվրոպայի Հայ Դատի հանձնախմբի նախագահը։
Գասպար Կարապետյանի խոսքով` Բելգիան, որը ճանաչել ու դատապարտել է Հայոց Ցեղասպանությունը, պետք է չընդուներ Թուրքիայի նախագահին, հատկապես 2015թ., երբ նշվում է Ցեղասպանության 100-րդ տարելիցը։
«Էրդողանը նախագահում է մի երկիր, որը շարունակում է ժխտողական քաղաքականություն վարել թե հայերի, եւ թե հույների, ասորիների նկատմամբ իրականացրած Ցեղասպանության ճանաչման հարցում։ Բելգիայի նման երկիրը, որը հարգում է մարդու իրավունքները, պետք է չընդուներ մի անձի, որը ոտնակոխում է ամեն տեսակի մարդկային իրավունքներ, եւ վերջին շրջանում քուրդ ժողովրդի դեմ պատերազմ է սկսել՝ լուրջ վտանգելով անմեղ մարդկանց կյանքը»,-ասաց Կարապետյանը։
Բելգիայի հայ համայնքը եւ երկրի քրիստոնյա փոքրամասնությունները, սակայն, ըստ Կարապետյանի, բողոքի ակցիաներ չեն անցկացրել։ Էրդողանի այցը բողոքի ակցիայի միջոցով դատապարտել է միայն քրդերի մի փոքր խումբ։
Գասպար Կարապետյանի խոսքով՝ Էրդողանի թիկնապահների վատ պահվածքի հետեւանքով առաջացած միջադեպը լայն քննարկման առարկա է դարձել բելգիական մամուլում։
«Էրդողանը մեծամտություն է անում՝ կարծելով, որ ինքը նոր սուլթան է, եւ իրեն պետք է բոլորը երկրպագեն։ Բելգիայում դա չընդունեցին։ Միջադեպերը համենայն դեպս իր այցելության վրա ազդեցին։ Էրդողանը մամուլում քննադատվեց Բելգիայի ազգային իրավունքների նկատմամբ վատ վերաբերմունք համար»,-ասաց Կարապետյանը։
Հիշեցնենք, որ Բելգիայում «Էգմոն» ինստիտուտում Էրդողանի ելույթից առաջ Թուրքիայի նախագահի թիկնապահները պնդել են, որ իրենց չի բավարարում բելգիացի VIP թիկնապահների իրականացրած ստուգումները, եւ իրենք նորից պետք է ստուգեն դահլիճը, ինչը վիճաբանության պատճառ է դարձել`ավարտվելով թուրք եւ բելգիացի թիկնապահների ծեծկռտուքով։
Նշենք, որ Թուրքիայի նախագահ Ռեջեփ Թայիփ Էրդողանը հոկտեմբերի 4–ին պետական այցով մեկնել էր Բելգիա, որտեղ մասնակցել էր «Եվրոպալիա» արվեստի միջազգային փառատոնի բացման արարողությանը, որի հյուրընկալող երկիրը 2015թ. Թուրքիան է, եւ հանդիպումներ ունեցել ինչպես Բելգիայի, այնպես էլ Եվրամիության պաշտոնյաների հետ։
Ավելի վաղ հաղորդել էինք, որ Բելգիայի մայրաքաղաքի քաղաքապետ Իվան Մեյերը հրաժարվել է Թուրքիայի նախագահին սրահ տրամադրել՝ հանրահավաք անցկացնելու համար։
