Եվրախորհուրդը դադարեցնում է մասնակցությունը Ադրբեջանում մարդու իրավունքների հարցերով համատեղ աշխատանքային խմբից։ Այս մասին այսօր՝ հոկտեմբերի 7-ին, ԵԽ նախարարների կոմիտեին տեղեկացրել է ԵԽ գլխավոր քարտուղար Թյորբորն Յագլանդը։
Իր որոշման մասին Յագլանդը նախապես տեղեկացրել է նաև Ադրբեջանի նախագահ Իլհամ Ալիեվին, հայտնում է գլխավոր քարտուղարի մամուլի ծառայությունը։
«2014 թ. հոկտեմբերից սկսած Եվրախորհրդի ներկայացուցիչը Բաքվում մասնակցել է հանդիպումների, որոնց նպատակն էր վերականգնել ադրբեջանական իշխանություների և քաղաքացիական հասարակության միջև երկխոսությունը։ Չնայած այս նախաձեռնությանը` Ադրբեջանում իրավապաշտպանների հետ կապված իրավիճակը էապես վատթարացել է։ Վերջերս աճել է բանտարկված իրավապաշտպանների թիվը, Եվրախորհուրդը մտահոգիչ տեղեկություններ է ստացել այն մասին, թե ինչ անընդունելի պայմաններում են պահվում նրանք»,– ասվում է գլխավոր քարտուղարի մամուլի ծառայության տարածած հաղորդագրությունում։
