Առողջապահության նախարարությունը սպասում է, թե ինչ դատավճիռ կկայացվի «Հեպատիտ С»-ի գործով։
NEWS.am-ի թղթակիցը առողջապահության նախարար Արմեն Մուրադյանից հետաքրքրվեց, թե ինչու են գործով երկու մեղադրյալները շարունակում աշխատել «Քաջարանի» բժշկական կենտրոնում, ինչին նա արձագանքեց, որ այդ հարցը պետք է տալ այն անձին, որը պատասխանատու է այդ երկու աշխատակիցների գործունեության համար։
«Մենք սպասողական դիրքորոշում ունենք, թե ինչպիսի դատավճիռ կլինի, քննության ինչպիսի արդյունքներ կլինեն։ Մենք մասնակցություն ենք ունեցել սոցիալական պատասխանատվություն կրող կողմի հետ բանակցություններում, որը դեղորայքով է ապահովել, ինչպես նաեւ հետեւել ենք, որ անաչառ ուսումնասիրություններ կատարվեն»,- ասաց նախարարը։
Ավելի վաղ հայտնել էինք, որ 2015թ. հունվարի 17-ին տեղեկություն էր ստացվել, որ «Քաջարանի բժշկական կենտրոն» բուժօգնության դիմած մի քանի քաղաքացիների մոտ նշված կենտրոնում բժշկական միջամտության, վիրահատության ենթարկվելուց հետո ախտորոշվել է «հեպատիտ c» հիվանդություն:
Դեպքի առթիվ հարուցվել էր քրեական գործ: Պարզվել էր, որ այս ընթացքում ընդհանուր անզգայացմամբ իրականացված վիրահատությունների ժամանակ միանգամյա օգտագործման համար նախատեսված ներշնչափողային խողովակները, արտածծիչ սարքի խողովակը եւ ծայրադիրներն օգտագործվել են բազմակի, նշված բժշկական գործիքները եւ ընդհանուր անզգայացման ժամանակ օգտագործված «լարինգոսկոպն» ախտահանվել են ՀՀ առողջապահության նախարարի մի շարք հրամանների պահանջների խախտումներով: Արձանագրվել են նաեւ սանիտարահամաճարակային ոլորտի այլ խախտումներ:
Քրեական օրենսգրքի 277-րդ հոդված 2-րդ մասով մեղադրանք է առաջադրվել«Քաջարանի բժշկական կենտրոն» ՓԲԸ նախկին տնօրեն Վարդան Ավագյանին, փոխտնօրեն Վիրաբ Մանասյանին, գլխավոր բուժքույր Արմեդա Վանեսյանին, ավագ բուժքույր Նորա Կարապետյանին, բժիշկ-անեսթեզիոլոգ Երվանդ Ավագյանին: Նրանց բոլորի նկատմամբ խափանման միջոց է ընտրվել ստորագրություն չհեռանալու մասին: