«Երեւանյան խաղում ինձ շատ տպավորեցին Արթուր Սարկիսովն ու Մարկոս Պիզելին»: Այդ մասին Նիս քաղաքի «Ալյանս Ռիվյերա» ստադիոնում հոկտեմբերի 8-ին կայանալիք Ֆրանսիա - Հայաստան ընկերական հանդիպման նախախաղային ասուլիսում հայտնեց Ֆրանսիայի հավաքականի գլխավոր մարզիչ Դիդյե Դեշամը:
«Հայաստանյան խաղի սկզբնամասում հայերը բավական լավ էին հանդես գալիս, բայց երբ մենք խփեցինք գոլը, խաղը փոխվեց: Պետք չէ հայերին թերագնահատել: Թե՛ Հայաստանին, թե՛ Ալբանիային պետք է նայել եվրոպական ուժեղ թիմերի պես, եւ այդ դեպքում մենք կունենաք հաջողություն: Երեւանյան խաղում բացակայում էր Մխիթարյանը, այդ պատճառով մեզ ավելի հեշտ էր: Հիմա, երբ նա կա, կարծում եմ, որ դժվարություններ կունենանք: Այնտեղ շատ լավ հանդես եկան Պիզելին եւ Սարկիսովը: Մենք ունենք խաղ կիրակի օրը Դանիայի դեմ: Կլինեն փոփոխություններ, ես չեմ կարող ասել, որ վաղը մենք խաղալու ենք երկրորդ կազմով, բայց որոշ ֆուտբոլիստների գուցե հանգիստ տամ»,- նշել է Դեշամը:
Մարզիչը նաեւ նկատել է, թե Մադրիդի «Ռեալի» հարձակվող Քարիմ Բենզեմային պետք է այդքան քննադատել քիչ է գոլեր խփելու պատճառով. «Ես նրան հավատում եմ»,- նշել է Դեշամը:
Ֆրանսիա - Հայաստան խաղն անցկացվելու է Նիսում, որտեղ օրեր առաջ սարսափելի ջրհեղեղ էր: Այդ կապակցությամբ Դեշամը նշել է հետեւյալը. «Կարծում եմ՝ խաղը լավ սփոփանք եւ ուրախություն կլինի այս քաղաքի բնակիչների համար»:
Վերա Մարտիրոսյան՝ Նիսից