Եթե երեք օրվա ընթացքում մենք բոլորս փողոցում լինենք եւ ժողովրդական անհնազանդության գործողություններ իրականացնենք, կտապալենք Սերժ Սարգսյանի եւ իշխող ՀՀԿ-ի իշխանությունը։ Այդ մասին հոկտեմբերի 8-ին, խորհրդարանում հայտարարել է «Ժառանգություն» կուսակցության խորհրդարանական խմբակցության ղեկավար Զարուհի Փոստանջյանը։
«Պետք է մինչեւ հանրաքվեի անցկացումն ընկած ժամանակահատվածն օգտագործել իշխանության տապալման համար։ Պետք չէ գնալ այն քվեարկությանը, որի արդյունքները ժողովրդի պարտությանն են հանգեցնելու։ Մեզ դարձյալ կասեն, որ մեր «Ոչը» չի անցել։ Հանրաքվեի արդյունքները կկեղծվեն», - ընդգծել է Փոստանջյանը՝ հավելելով, որ «Ժառանգություն» կուսակցությունը քաղաքական ուժերի եւ առանձին վերցրած քաղաքական գործիչների հետ խորհրդակցություններ է անցկացնում։
Իր հերթին խորհրդարանի խոսնակ Գալուստ Սահակյանը հայտարարել է, որ իմաստ չունի ռեպլիկներով պատասխանել Փոստանջյանի հայտարարությանը. «Իմաստ չունի, թող ամբողջ պատասխանատվությունը նրա վրա ընկնի»։