Արդրբեջան փախած Վահան Մարտիրոսյանի մայրը՝ Ջուլիետա Վիրաբյանը, իր անզգուշության հետեւանքով է հոկտեմբերի 7-ին վրաերթի ենթարկվել:
«Էրեբունի» բժշկական կենտրոնում գտնվող Ջուլիետա Վիրաբյանը լրագրողների հետ զրույցում նշեց, որ անզգույշ է եղել փողոցն անցել:
«Պատահականություն էր, չնկատեցի, անցումն էի անցնում, ինքն էլ երեւի անզգույշ էր քշում: Երկու հոգու անզգուշություն, եւ վրաերթի ենթարկվեցի: Վարորդը շտապօգնություն կանչեց, հետս էր երեկ ամբողջ ընթացքում: Անհանգստանում էր, շատ լավ մարդ էր»,- NEWS.am–ի հետ զրույցում ասաց Ջուլիետա Վիրաբյանը:
Ջուլիետա Վիրաբյանը ստացել է ազդրի վզիկի կոտրվածք: Այս պահին կնոջը հետազոտում են: Հետազոտությունց հետո պարզ կլինի` վիրահատություն անհրաժեշտ է, թե ոչ:
Ավելի վաղ հայտնել էինք, որ հոկտեմբերի 7-ին, 08։50–ին, փողոցն անցնելիս վրաերթի է ենթարկվել Վահան Մարտիրոսյանի մայրը՝ 68-ամյա Ջուլիետա Վիրաբյանը, որը տեղափոխվել է «Էրեբունի» բժշկական կենտրոն, այժմ հիվանդասենյակում է:
Հիշեցնենք, որ գողության մեջ մեղադրվող, կնոջ եւ երեխայի հետ Հայաստանից հեռացած եւ Բաքվից քաղաքական ապաստան խնդրած Վահան Մարտիրոսյանի նկատմամբ միջպետական հետախուզում է հայտարարվել:
Մինչեւ Ադրբեջան փախչելը՝ Վահան Մարտիրոսյանը հայտարարել էր, թե իրեն ծեծի է ենթարկել ՀՀԿ-ական պատգամավոր Մհեր Սեդրակյանը, ինչն ավելի ուշ ոստիկանությունը հերքել էր:
