Ռուսաստանի նախագահ Վլադիմիր Պուտինը տեղեկացված է՝ ռուսական գազի գնումներից հրաժարվելու հավանականության վերաբերյալ իր թուրք գործընկեր Ռեջեփ Թայիփ Էրդողանի արտահայտությունների մասին: Այս մասին, այսօր՝ հոկտեմբերի 8-ին, լրագրողների հետ զրույցում նշել է ՌԴ նախագահի մամուլի քարտուղար Դմիտրի Պեսկովը:
Նա նշել է, որ Կրեմլը հույս ունի պահպանել երկու երկրների փոխշահավետ համագործակցությունը, իսկ Սիրիայում ռազմական գործողությունը դիտարկում է որպես օգնություն Թուրքիայի սահմաններին անվտանգության ապահովմանը, հիշեցնելով, որ ԱՄՆ ղեկավարած կոալիցիայի ջանքերը չեն հանգեցրել ահաբեկիչների վերահսկողության տակ գտնվող տարածքների կրճատմանը, որոնք վերջին մեկ տարվա ընթացքում, հակառակը, բազմապատկվել են:
«Նախագահն անկասկած տեղյակ է պարոն Էրդողանի տվյալ արտահայտություններին: Մենք ավանդաբար բարձր ենք գնահատում Թուրքիայի հանրապետության հետ մեր երկկողմանի հարաբերությունները, եւ անկեղծորեն հույս ունենք , որ այդ հարաբերություներն այսուհետ նույնպես վերընթաց զարգացում կունենան՝ նախագահներ Վլադիմիր Պուտինի ու Էրդողանի նախանշած ծրագրերին համապատասխան»,- լրագրողներին հայտարարել է ՌԴ նախագահի մամուլի քարտուղար Դմիտրի Պեսկովը:
Կրեմլի ներկայացուցիչը շեշտել է , որ «դա փոխշահավետ համագործակցություն է ու համապատասխանում է երկու երկրների ժողովուրդների շահերին»,- փոխանցում է «ՏԱՍՍ»-ը:
Նա նշել է, ոչ Սիրիայում ռազմական գործողությունը օգնում է անվտանգություն ապահովել Թուրքիայի սահմաններին , ինչը չի հաջողվել անել ԱՄՆ ղեկավարած կոալիցիայի ռմբակոծություններով: «Ինչ վերաբերում է Սիրիայում ՌԴ գործողություններին, ապա այդ գործողությունների նպատակն է նպաստել Սիրիայի արաբական հանրապետության տարածքային ու քաղաքական ամբողջականության պահպանմանը, դրանով իսկ աջակցելով կայունության ու անվտանգության ապահովմանն այս տարածաշրջանում , որը սահմանակից է հենց Թուրքիայի հանրապետությանը»,- արձանագրել է Պեսկովը: Նրա կարծիքով, «այս առումով Ռուսաստանն անկասկած նպաստում է Թուրքիայի սահմաններին կայունության ու անվտանգության ամրապնդմանը»:
