«Ազգային ինքնորոշում միավորում» կուսակցության առաջնորդ Պարույր Հայրիկյանն այսօր՝ հոկտեմբերի 8-ին, վերջնագիր-ուղերձ փոխանցեց ՀՀ նախագահ Սերժ Սարգսյանին, պահանջով չդնել հանրաքվեի սահմանադրական փոփոխությունների նախագիծը, որը հաստատվել է ԱԺ–ի կողմից:
«Նախագահին մեր 3-րդ ուղերձը հանձնեցինք` ասելով, որ նա անհատապես պատասխանատու է ազգադավ գործունեության համար, որը շատ արագ պետք է կասեցնել: Եթե չանի՝ ամեն ինչ ընկնելու է իր վրա, նրա համար սա վերջին հնարավորությունն է պատմական ծանր բեռի տակ չմտնելու համար: Հայաստանի 1-ին, 2-րդ նախագահներն էլ են ասում, որ նման քայլի գնալը սխալ է, Սերժ Սարգսյանը ուզում է հազար պատգամավոր հավաքի, որոնք կասեն` ճիշտ է անում, բայց նորից ոչինչ չի փոխվի, ամեն ինչից վերև կա օրենք»,-ասաց Պարույր Հայրիկյանը:
Վերջնագիր-ուղերձը նախագահականին փոխանցելուց հետո Պարույր Հայրիկյանը շարժվեց դեպի ՀՀ գլխավոր դատախազություն:
NEWS.am-ի հետ զրույցում ԱԻՄ առաջնորդ Պարույր Հայրիկյանը նշեց, որ ԱԻՄ կուսակցությունը նաև դիմելու է դատախազություն՝ Հայաստանի սահմանադրական փոփոխությունների հանձնաժողովի անդամներին դեմ քրեական գործ հարուցելու համար՝ ՀՀ Սահմանադրությունը խախտելու և իրենց ունեցած իշխանությունը չարաշահելու համար:
Հիշեցնենք, որ Հայաստանի Ազգային ժողովը 2015թ. հոկտեմբերի 5-ին, ընդունել է «ՀՀ նախագահի համար ընդունելի առաջարկների հիման ՀՀ սահմանադրության փոփոխությունների նախագիծը հանրաքվեի դնելուն համաձայնություն տալու մասին ԱԺ որոշման նախագիծը»: Որոշմանը կողմ է քվեարկել 104, դեմ՝ 10, ձեռնպահ` 3 պատգամավոր: Նախագիծը ուղարկվել է հանրապետության նախագահի հաստատմանը։
Հիշեցնենք, որ Սահմանադրության նոր նախագծով նախատեսվում է անցում կատարել կառավարման խորհրդարանական համակարգին եւ համամասնական 100 տոկոսանոց ընտրակարգին: