Գերմանական Volkswagen ընկերությունը դատախազությանն է փոխանցել  իր մեքենաներում արտանետումները չափող տվիչների կեղծման վերաբերյալ տվյալները։ Այդ մասին հինգշաբթի օրը հաղորդել են ավտոկոնցեռնի ներկայացուցիչները։ 

Նյութերի «համընդգրկուն հավաքածուն» ներկայացվել է քննիչներին, ընկերության հայտարարությունն է մեկնաբանում Reuters-ը։

Ինչպես ավելի վաղ հայտնել էին Բրաունշվեյգի դատախազությունում, ԳԴՀ-ի օրինապահ մարմինները հինգշաբթի օրը  «դիզելային սկանդալի» առիթով խուզարկություն են կատարել Volkswagen-ի՝ Վոլֆսբուրգում գտնվող գլխավոր շտաբում եւ այլ քաղաքներում գտնվող գրասենյակներում։  

Volkswagen սկանդալի կենտրոնում էր հայտնվել այն բանից հետո, երբ պարզվել էր, որ նրա արտադրած մեքենաներում այնպիսի ծրագիր է ներդրված, որը թույլ է տալիս շրջանցել ԱՄՆ-ի բնապահպանական խիստ նորմերը։