Հայաստանի Հանրապետության քննչական կոմիտեն պետք է անզիջում լինի հանցավորության դեմ պայքարում եւ հետեւողական։ Այդ մասին ասվում է նախագահ Սերժ Սարգսյանի՝ Քննչական կոմիտեի ծառայողի օրվա առթիվ ուղերձում։
«Հայաստանի Հանրապետության քննչական կոմիտեի հարգելի՛ աշխատակիցներ,
Ջերմորեն շնորհավորում եմ ձեզ Հայաստանի Հանրապետության քննչական կոմիտեի ծառայողի օրվա կապակցությամբ:
Արդեն շուրջ մեկ տարի է, ինչ լիարժեք գործում է արտագերատեսչական քննչական կառույցը՝ Հայաստանի Հանրապետության ոստիկանության եւ Հայաստանի Հանրապետության պաշտպանության նախարարության քննչական ծառայությունների միավորմամբ ձեւավորված Հայաստանի Հանրապետության քննչական կոմիտեն:
Հայաստանի Հանրապետության քննչական կոմիտեի ստեղծման օրվանից նրա առջեւ ծառացան կազմակերպական, իրավական, նյութատեխնիկական եւ կադրային մի շարք խնդիրներ: Այժմ, երբ այդ խնդիրների մեծ մասը լուծվել է, կարելի է փաստել, որ Հայաստանի ամենամեծ քննչական մարմինը կայացման ճանապարհին է:
Հայաստանի Հանրապետության քննչական կոմիտեն կարճ ժամանակահատվածում կարողացել է զգալի դերակատարություն ստանձնել հանցավորության դեմ պայքարի, մարդու իրավունքների եւ հիմնարար ազատությունների պաշտպանության, ինչպես նաեւ պետականության ու իրավակարգի ամրապնդման գործում:
Հայաստանը հռչակված է որպես ժողովրդավարական եւ իրավական երկիր, հետեւաբար, Հայաստանի Հանրապետության քննչական կոմիտեի աշխատանքը պետք է խարսխվի այդ սկզբունքների վրա: Հայաստանի Հանրապետության քննչական կոմիտեն պետք է անզիջում լինի հանցավորության դեմ պայքարում եւ հետեւողական՝ մարդու իրավունքների եւ ազատությունների պաշտպանության գործում, առաջնորդվի սկզբունքայնությամբ եւ պատվախնդրությամբ, լինի ամուր եւ օրինապահ պետական կառույց, ինչը հնարավոր է միայն անխոնջ եւ աննկուն աշխատանքով: Վստահ եմ, որ Հայաստանի Հանրապետության քննչական կոմիտեն իր արժանի տեղը կգտնի իրավապահ մարմինների համակարգում:
Կրկին շնորհավորելով մասնագիտական տոնի առթիվ՝ մաղթում եմ ձեզ նոր ձեռքբերումներ քննչական դժվարին ծառայության մեջ, առողջություն եւ երջանկություն՝ ձեզ եւ ձեր ընտանիքներին»,- նշել է Սարգսյանը: