Սիրիայի Արաբական հանրապետության զինված ուժերն այսօր լայնածավալ հարձակում են սկսել՝ ահաբեկչական խմբավորումներին ոչնչացնելու եւ ահաբեկչության ու հարձակումների հետեւանքով տուժած շրջաններն ու բնակավայրերն ազատագրելու նպատակով: Այս մասին Սիրիայի պետական հեռուստատեսության ելույթում հայտարարել է Սիրիայի Բանակի եւ Զինված ուժերի գլխավոր շտաբի ղեկավար, գեներալ Ալի Աբդուլլա Այուբը:
Նրա խոսքով, Ռուսաստանի ռազմական ավիացիայի իրականացրած ավիահարվածների արդյունքում զգալիորեն նվազել է ԻԼԻՊ-ի եւ ահաբեկչական այլ կազմակերպությունների մարտական պոտենցիալը:
Սիրիական ՍԱՆԱ գործակալության փոխանցմամբ, Հալեպի նահանգում Ռուսաստանի ռազմական ավիացիայի գործողությունների արդյունքում հարյուրավոր ահաբեկիչներ են ոչնչացվել:
Անադան, Ալ-Աթարեբ, Դեյր-Հաֆիր շրջաններում, արեւմտյան Ալ-Մանսուր բնակավայրում եւ Ալ-Բաբ ավանում թիրախային հարվածների հետեւանքով էլ հարյուրավոր ահաբեկիչներ են ոչնչացվել, ինչպես նաեւ տասնյակ զրահամեքենաներ, երկու «Գրադ» հրթիռանետ եւ զինամթերքի մեծ պահեստ: