Անհրաժեշտ է հետեւել Մադրիդյան սկզբունքների հիման վրա երկխոսությանը՝ ղարաբաղյան հակամարտությունը խաղաղ ճանապարհով լուծելու նպատակով: Այս մասին NEWS.am-ի թղթակցի հետ զրույցում հայտարարեց Ֆրանսիայի եվրոպական հարցերի պետնախարար Առլեմ Դեզիրը, որը Երեւան է ժամանել՝ մասնակցելու Ֆրանկոֆոնիայի միջազգային կազմակերպության երկրների ԱԳՆ ղեկավարների ֆորումի 31-րդ նստաշրջանին:
Անդրադառնալով ղարաբաղյան հակամարտության շուրջ բանակցային գործընթացի ապագային, հաշվի առնելով ադրբեջանական կողմի հրադադարի ռեժիմի հաճախակի խախտումները, Առլեմ Դեզիրն ընդգծեց, որ Ֆրանսիայում տեղյակ են հրադադարի խախտումների մասին:
«Գիտեք, որ Ֆրանսիան Ռուսաստանի եւ ԱՄՆ-ի հետ միասին, որպես ԵԱՀԿ Մինսկի խմբի համանախագահող երկիր, հավատարիմ է խաղաղ բանակցություններին: Եվ վաղը մենք այդ հարցը կքննարկենք Հայաստանի ԱԳ նախարարի հետ»,- հավելեց ֆրանսիացի պաշտոնյան:
