Բրյուսելում երկաթուղային տրանսպորտը կաթվածահար է եղել Բելգիայի երկաթուղու ազգային միության աշխատակիցների 24-ժամյա գործադուլի պատճառով:
Գործադուլը սկսվել է նախօրեին ուշ երեկոյան:
Բրյուսել- Փարիզ ու Փարիզ- Բրյուսել երթուղիներում ուրբաթ չեղյալ են հայտարարվել Thalys ճեպընթաց գնացքների բոլոր ռեյսերը, բացի երկուսից՝ երեկոյան ժամերին: Գործադուլը խախտել է նաեւ Բրյուսելի ու Լոնդոնի միջեւ երթևեկող Еurostar գնացքների չվացանկը: Բրիտանիայի մայրաքաղաքից ճանապարհվող ուղեւորներին իջեցնում են Լիլ ֆրանսիական քաղաքում, իսկ այնտեղից արդեն ավտոբուսներով հասցնում Բրյուսել:
Ինչպես հայտնել է Libre Belgique թերթը, գնացքավարներն ու կոնդուկտորները այս գործադուլով իրենց բողոքն են արտահայտում Բելգիայի կառավարության ծրագրերի դեմ, որոնց համաձայն կառավարությունը պատրաստակամություն է հայտնում գործադուլների դեպքում ապահովել երկաթուղային տրանսպորտի ուղեւորների սպասարկումը, հայտնում է «ՌԻԱ Նովոստին»: