Ադրբեջանը նեղացել է ԵԱՀԿ Մինսկի խմբի համանախագահ-երկրներից։ Պատճառն այն է, որ Ադրբեջանի ԱԳՆ «սեւ ցուցակում» հիմնականում հենց Մինսկի խմբի համանախագահ-երկրների կամ զարգացած եվրոպական պետությունների քաղաքացիներն են։
Ինչպես գրում է haqqin.az-ը՝ վկայակոչելով Dailykarabakh-ը, ԱԳՆ «սեւ ցուցակում» ընդգրկված է 49 երկրների 501 քաղաքացի։ Հատկապես մեծ թիվ են կազմում ՌԴ քաղաքացիները՝ 133 մարդ։ Երկրորդ տեղում Մինսկի խմբի համանախագահ ԱՄՆ-ն է՝ 41 մարդ։ Իսկ առաջին եռյակը եզրափակում է Գերմանիան՝ 38 մարդ։ Ի դեպ, Գերմանիան նույնպես Մինսկի խմբում է։
Ցուցակում կա Իտալիայի 36 եւ Ֆրանսիայի 30 քաղաքացի։ Մեծ Բրիտանիան ունի Ադրբեջանում նոն գրատա հայտարարված 19 քաղաքացի, իսկ Շվեյցարիան՝ 10։
Բացի այդ, «սեւ ցուցակում» են Վրաստանի 11, Ադրբեջանի «եղբայրական» Թուրքիայի 2 եւ Իրանի 3 քաղաքացիներ։
Հիշեցնենք, որ «սեւ ցուցակում» են հայտնվում այն մարդիկ, որոնք այցելում են Լեռնային Ղարաբաղ առանց Ադրբեջանի թույլտվության։ Ցուցակը տարեցտարի մեծանում է։