Ֆիլիպինների բանտերից մեկում բռնկված հրդեհից զոհվել է 9 մարդ։ Եվս մի բանտարկյալ անհետ կորած է համարվում։ Այս մասին հայտնում է AFP-ն՝ վկայակոչելով տեղական իշխանություններին։

Ինչպես հայտնել է երկրի արդարադատության նախարարությունը, հրդեհը բռնկվել է Լեյտե կղզու Աբույոգ քաղաքում, որը մայրաքաղաք Մանիլայից 620 կմ հարավ-արեւելք է ընկած, գրում է «ՌԻԱ Նովոստի»-ն։

Ինչպես գործակալությանը հայտնել է արդարադատության նախարար Լեյլա դե Լիման, զոհվածների մեծ մասը գտնվում էր հոգեկան հիվանդների համար նախատեսված մասնաշենքում։

Աբույոգ քաղաքի ոստիկանապետի տեղակալ Կոնստանտինո Պեդրոսայի խոսքով՝ հրդեհը չէր հաջողվում մարել մոտ 8 ժամ։ Հրդեհից ամբողջովին այրվել է բանտի մեկ մասնաշենք, որը նախատեսված էր 500 մարդու համար, սակայն որտեղ պահվում էր 1256 բանտարկյալ։

Այս պահին հրդեհի պատճառները պարզելու համար հետաքննություն է ընթանում։