«Ալյանս» ավիաընկերությունը թռիչքներ կսկսի իրականացնել 2016թ. մարտից: Այս մասին այսօր՝ հոկտեմբերի 9-ին, լրագրողների հետ հանդիպմանն ասաց «Ալյանս» ավիաընկերության հիմնադիր տնօրեն Արարատ Սարգսյանը: Հիմնադիր տնօրենը նշեց, որ ընկերությունը դեռ 2 ինքնաթիռ ունի, ավիաընկերությունն իրականացնելու է շուրջ 13 ուղղություններով չվերթներ՝ Երեւան-Մոսկվա, Երեւան-Բեյրութ, Երեւան-Իրան, Երեւան-Աշխաբադ եւ Ռուսաստանի Դաշնություն: Հիմնադիր տնօրենը նշեց, որ ավիաընկերությունը բացվել է 2014թ. ապրիլին եւ քաղավիացիայի կողմից արդեն շահագործողի վկայական է ստացել:
«Քանի որ ամառային չվացուցակը մարտից է սկսվում, որոշեցինք թռիչքներն իրականացնել մարտից: Գնային քաղաքականությունը որոշելը շատ բարդ է, այն շատ բարձր չի լինի, ամեն ժամ, ամեն րոպե, ամեն թռիչքից առաջ կվերանայվի»,-ասաց Արարատ Սարգսյանը:
Ըստ Արարատ Սարգսյանի ամենամեծ սխալը բաց երկնքի քաղաքականությունն իրականացնելն էր, քանի որ չունենալով հայկական փոխադրող, սկսվեց աշխատանքը ռուսական չորս խոշոր ավիաընկերության հետ:
«Արմավիան չձախողովեց, այլ ձախողեցին, քանի որ այն մենաշնորհ էր շուկայում եւ իրավունք չուներ ձախողվելու: Հիմնական սխալները կադրային ու մենեջմենտի հարցերն էին: Շուկան ռիսկային է, բայց ես այդ ռիսկին դիմում եմ, քանի որ իմ ինքնաթիռները 100 տեղից ավելի են»,-ասաց Սարգսյանը: