Երեւանը ՌԴ հյուսիսային մայրաքաղաքի համար կայուն եւ վստահելի գործընկեր է: Այս մասին, այսօր՝ հոկտեմբերի 9-ին, Երեւանի քաղաքապետ Տարոն Մարգարյանի հետ հանդիպման ժամանակ նշել է Սանկտ Պետերբուրգի փոխնահանգապետ Օլգա Կազանսկայան, ով Երեւան է այցելել «Էրեբունի-Երեւան 2797» տոնակատարություններին մասնակցելու նպատակով:
Քաղաքապետարանից NWES.am-ին հայտնում են, որ ողջունելով հյուրերին` քաղաքապետ Տարոն Մարգարյանը ասել է. «Երկու քաղաքների միջեւ ստորագրված համագործակցության նոր` 2015-2020թթ. ծրագիրը, մեկ անգամ եւս փաստում է, որ մեր գործընկերային հարաբերություններն իսկապես արդյունավետ են, հաջողված ու հեռանկարային: Վստահ եմ, որ փոխգործակցության այս նոր փուլը հնարավորություն կտա ընդլայնելու գործակցության շրջանակներն ու իրականացնելու իսկապես փոխշահավետ համագործակցություն՝ ի բարօրություն երկու քաղաքների բնակիչների: Համոզված եմ նաեւ, որ մեր այս հանդիպումը եւս գործնական նոր որակ կհաղորդի Երեւանի եւ Սանկտ Պետերբուրգի միջեւ կառուցողական ծրագրերի իրականացմանը»:
Օլգա Կազանսկայան նախ շնորհավորել է Տարոն Մարգարյանին Երեւանի օրվա առթիվ` նկատելով, որ Երեւանը ՌԴ հյուսիսային մայրաքաղաքի համար կայուն եւ վստահելի գործընկեր է:
«Համագործակցության նոր ծրագիրն իսկապես նոր հնարավորություն է՝ գտնելու համատեղ լուծումներ քաղաքային տնտեսության արդյունավետ կառավարման ու առկա խնդիրների լուծման առումով: Այս հարցում, անշուշտ, իր կարեւոր դերակատարումն ունի մեր երկու ժողովուրդների դարավո ր բարեկամությունը եւ, իհարկե, երկու քաղաքների միջեւ հաստատված փոխգործակցության ծրագրի արդյունավետ կյանքի կոչման ուղղությամբ Ձեր հետեւողականությունը, պարոն քաղաքապետ, որը հնարավորություն է տալիս այն դարձնել առավել առարկայական ու շոշափելի: Երեւանի օրվան նվիրված տոնակատարությունն արդեն մեզ համար դարձել է հոգեհարազատ, եւ համոզված եմ, որ այս անգամ եւս հրաշալի տպավորություններով ենք վերադառնալու Սանկտ Պետերբուրգ», - նշել է Օլգա Կազանսկայան: