2016թ.-ին 2.2 տոկոս տնտեսական աճ ենք ունենալու: Այսօր` հոկտեմբերի 9-ին, լրագրողների հետ հանդիպմանը նման կանխատեսում արեց ԱԺ ՀՀԿ խմբակցության պատգամավոր, ֆինանսավարկային եւ բյուջետային հարցերի մշտական հանձնաժողովի նախագահ Գագիկ Մինասյանը:
«Կանխատեսումներ անելիս պետք է ուշադրություն արժանացնենք այն իրողություններին, որոնք առկա են մեր տնտեսական բնագավառում մեր առավել համագործակցություն ունեցող երկրների տեսակետից; Առաջին հերթին ԵՏՄ երկրների տնտեսություններին պետք է ուշադրություն դարձնել, հատկապես Ռուսաստանում տեղի ունեցող զարգացումներին: ՌԴ տնտեսական զարգացումը, ըստ միջազգային կառույցների, լինելու է 0.2 տոկոս: ԵՄ գործընկերների մոտ նույնպես տնտեսական աճի կանխատեսումները համեստ են: Ըստ իմ կանխատեսումների` Հայաստանում հաջորդ տարի կլինի 2.2 տոկոս տնտեսական աճ»,- ասաց Գագիկ Մինասյանը:
Հիշեցնենք, որ այս տարվա համար իշխանությունները կանխատեսում են մինչեւ 3.5-4 տոկոս աճ, որի մասին բարձրաձայնել է ՀՀ վարչապետ Հովիկ Աբրահամյանը: