Սահմանադրական փոփոխությունների դեմ պայքարի պատասխանատուն պետք է դառնա Հայ ազգային կոնգրեսը։ Այս մասին հոկտեմբերի 9-ին՝ խորհրդարանական ճեպազրույցների ժամանակ, հայտնել է ՀԱԿ խմբակցության ղեկավար Լեւոն Զուրաբյանը։

Նա նշել է, որ խորհրդարանական խմբակցություններից դեմ է քվեարկել միայն ՀԱԿ-ը։ «Ժառանգություն» կուսակցությունը դեմ է արտահայտվում, բայց եթերում արշավի ժամանակահատվածի դիմումի հետ կապված ֆորմալ խնդիրներ ունի։ «Նման դիմում կարող է ներկայացնել կամ խմբակցության ղեկավարը կամ քարտուղարը։ Իսկ այդտեղ հարցեր են առաջանում»,- պարզաբանեց Զուրաբյանը։ Հիշեցնենք, որ վերջերս «Ժառանգությունից» հեռանալու մասին հայտարարել էր խմբակցության ղեկավար Ռուբեն Հակոբյանը։

Դեմ արտահայտվող ուժերը պետք է եթերում նույն հնարավորություններն ունենան, ինչ որ կողմ արտահայտվողները։ Զուրաբյանը նշեց, որ Վենետիկի հանձնաժողովը կոչ է անում հանրաքվեն անցկացնել եվրոպական չափանիշներով։ «Սակայն այդ չափանիշներն արդեն չեն գործում, եթե Ոստիկանությունը «Ոչ»-ի ճակատի հանրահավաքների ժամանակ սկսում է ձերբակալել քաղաքացիներին»,- ասաց ՀԱԿ խմբակցության ղեկավարը։