Թուրքիայի օդային սահմանները Սիրիայում գտնվող ռուսական ռազմական օդանավերի կողմից մի քանի օր շարունակ խախտումները եւ ՌԴ-ի կողմից դրա հետ կապված հայտարարությունը ցույց է տալիս, որ Ռուսաստանը զգուշացրեց, որ այլեւս թույլ չի տա օգնել ահաբեկիչներին։ Նման տեսակետ, այսօր՝ հոկտեմբերի 9-ին, լրագրողների հետ հանդիպմանը հայտնեց թուրքագետ Անդրանիկ Իսպիրյանը։
Նա շեշտեց, որ Սիրիայում ռուսական ռազմական օդանավերի կողմից մի քանի օր շարունակ Թուրքիայի օդային սահմանների խախտումները չեն կարող ուղղակի պատահականություն լինել։ Իսպիրյանը պնդեց, թե Ռուսաստանը տեղյակ է, որ Սիրիայում Ասադի դեմ կռվող ահաբեկիչները հիմնական օգնությունն ստանում են Թուրքիայից, եւ իր ավիահարվածների էֆեկտիվությունը մեծացնելու համար պետք է կանգնեցնի Թուրքիայից եկող օժանդակությունն ահաբեկիչներին։
«Ռուսական ռազմական օդանավերը մի քանի անգամ խախտել են Թուրքիայի օդային սահմանները։ Թուրքիան այդ հարցով 2 անգամ երկրի ԱԳՆ է կանչել Անկարայում Ռուսաստանի դեսպանին եւ բողոքի նոտա հանձնել։ Այս միջադեպերից հետո Ռուսաստանի նախագահի մամուլի քարտուղար Դմիտրի Պեսկովի հայտարարությունը, թե Ռուսաստանը Սիրիայում ավիահարվածներով նաեւ Թուրքիայի սահմաններն է պաշտպանում, ցույց է տալիս, որ սրանով Ռուսաստանը զգուշացնում է Թուրքիային՝ դադարեցնել օժանդակել Ասադի դեմ կռվող ահաբեկչական խմբավորումներին, քանի որ թուրք-սիրիական սահմանն այսուհետ Ռուսաստանի հսկողության տակ է լինելու»,-նշեց Իսպիրյանը։
