Սահմանագոտում իրադրության հետագա լարվածության աճն անթույլատրելի է։ Նման կարծիք են հայտնել ՀՀ պաշտպանության նախարարի առաջին տեղակալ Դավիթ Տոնոյանն ու ԵԱՀԿ Մինսկի խմբի ֆրանսիացի համանախագահ, դեսպան Պիեռ Անդրիոն։
Փոխնախարարն այսօր՝ հոկտեմբերի 9-ին ընդունել է ԵԱՀԿ Մինսկի խմբի ֆրանսիացի համանախագահ, դեսպան Պիեռ Անդրիոյին եւ նրա հետ քննարկել հայ-ադրբեջանական պետական սահմանին եւ շփման գծում տիրող իրավիճակը:
ՊՆ մամուլի ծառայությունից NEWS.am-ին հայտնում են, որ դեսպան Անդրիոյի խնդրանքով Դավիթ Տոնոյանը ներկայացրել է անցած շաբաթների ընթացքում շփման գծում լարվածության աճի մանրամասներն ու հրադադարի խախտումների հետեւանքները:
Կարեւորելով սահմանագոտում իրադրության հետագա լարվածության աճի անթույլատրելիությունը եւ բանակցային գործընթացում կառուցողականություն ցուցաբերելու անհրաժեշտությունը՝ կողմերը կարծիքներ փոխանակեցին նաեւ փոխվստահության մթնոլորտի ձեւավորման եւ հրադադարի ռեժիմի պահպանման տարբեր հնարավորությունների շուրջ: