Իսրայելական բանակի զինվորները հոկտեմբերի 9-ին Գազայի հատվածի սահմանամերձ շրջանում երեք պաղեստինցու են սպանել։ Այս մասին հայտնում է «Եդիոթ Ահրոնոթ» թերթի ինտերնետային կայքը։ Եվս 15 պաղեստինցի վիրավորվել է։
Միջադեպը տեղի է ունեցել այն ժամանակ, երբ Գազայի հատվածի բնակիչների 200-հոգանոց մի խումբ մոտեցել է սահմանին։ Զինվորականները կրակ են արձակել նրանց ուղղությամբ, երբ ցուցարարները փորձել են մտնել բուֆերային գոտի։
Վերջին օրերին պաղեստինցների եւ Իսրայելի անվտանգության ուժերի միջեւ Հորդանանի արեւմտյան ափին եւ Երուսաղեմի արեւելյան հատվածում բախումները հաճախակի են դարձել, գրում է «Ինտերֆաքս»-ը։
Ավելի վաղ Գազայի հատվածում իշխող ՀԱՄԱՍ-ի ղեկավարը հայտնել էր, որ այդ բախումները պաղեստինյան ապստամբության նոր դրսեւորում է՝ «ինթիֆադա»։
