Արցախի իշխանությունները մեծապես կարեւորում են մարդու իրավունքների պաշտպանության անընդհատ բարելավումը հանրապետությունում։ Այդ մասին հայտարարել է Արցախի վարչապետ Արայիկ Հարությունյանը Հայաստանի օմբուդսմեն Կարեն Անդրեասյանի հետ Ստեփանակերտում կայացած հանդիպմանը։
ՀՀ ՄԻՊ գրասենյակից NEWS.am-ին հայտնում են, թե վարչապետը ողջունել է Կարեն Անդրեասյանի ցուցաբերած ուշադրությունն Արցախի հանդեպ՝ համոզմունք հայտնելով, որ նրա պարբերական այցերն իրենց պտուղներն են տալու տեսանելի ժամանակահատվածում: «Արցախի իշխանությունները մեծապես կարեւորում են մարդու իրավունքների պաշտպանության անընդհատ բարելավումը հանրապետությունում՝ խրախուսելով թե՛ պետական եւ թե՛ քաղաքացիական հասարակության կառույցների ակտիվ մասնակցությունն այդ գործում: Մեր նպատակն է անվտանգության, բարեկեցության եւ իրավահավասարության հնարավորինս արդյունավետ պայմաններ ապահովել բոլորի համար, որպեսզի հայրենիքը մշտապես քայլի զարգացման ուղով»,- նշել է վարչապետը:
Օմբուդսմենն ուրախություն է հայտնել մարդու իրավունքների պաշտպանության ոլորտում Արցախի ունեցած նշանակալի ձեռքբերումների առթիվ՝ պատրաստակամություն հայտնելով հնարավորինս մասնակից լինել հետագա հաջողությունների գրանցման գործում: Կողմերը քննարկել են համագործակցության հնարավորությունները՝ ձեռք բերելով կոնկրետ պայմանավորվածություններ: