Երեւանի Ամիրյան փողոցում այսօր` հոկտեմբերի 9-ին, ինքնաշեն շինարարական վերելակը պոկվել է այն աշխատեցնող բանվորի մեղավորությամբ։ Այս մասին NEWS.am–ին ասացին շինարարությամբ զբաղվող աշխատակիցները, որոնք հրաժարվեցին ներկայանալ։
Նրանց խոսքով` բանվորը, մոտ 50 տարեկան տղամարդ, նախատեսվածից շատ է բեռնել վերելակը, որը 5–րդ հարկ հասնելուց հետո դուրս է եկել ռելսերից ու ընկել։ Աղյուսներն ընկել են բանվորի վրա, որը վերելակը ղեկավարում էր ներքեւից, բանվորը հիմնականում ոտքերի եւ ձեռքի շրջանում վնասվածքներ, այդ թվում կոտրվածք է ստացել ու տեղափոխվել հիվանդանոց։
Բանվորն այժմ Երեւանի թիվ 1 կլինիկական հիվանդանոցում է, նրա վիճակը բավարար է։
Ավելի վաղ հաղորդել էին, որ Հայաստանի ՏԿԱԻՆ-ում, այսօր՝ հոկտեմբերի 9-ին, ժամը 16.06-ին ահազանգ է ստացվել, որ Երեւանի Ամիրյան փողոցի թիվ 26 շենքի (կիսակառույց շինություն) արտաքին ինքնաշեն վերելակը պոկվել եւ ընկել է, կա տուժած. անհրաժեշտ է օգնություն:
Դեպքի վայր է մեկնել մեկ մարտական հաշվարկ եւ ՀՆՓԱԻԿ փրկարարական ջոկատը:
ՏԿԱԻՆ-ից NEWS.am-ի թղթակցին հայտնեցին, որ տուժածը մոտ 50 տարեկան տղամարդ է, նրա ինքնությունը դեռ չի պարզվել: Այս պահին նա բժշկական օգնություն է ստանում թիվ 1 կլինիկական հիվանդանոցում:
