Բելգիայի թուրքական համայնքում Հայոց ցեղասպանության ճանաչման գործընթաց է սկսվել: Ծիծեռնաաբերդ եւ Ցեղասպանության թանգարան-ինստիտուտ այցելությունից հետո NEWS.am-ի թղթակցի հետ զրույցում այս մասին հայտարարեց Վալոնիա-Բրյուսելի նախարար-նախագահ Ռուդի Դեմոտը:
Հարցին, արդյո՞ք Հայոց ցեղասպանության ճանաչման մասին Բելգիայի վարչապետ Շառլ Միշելի հայտարարությունից հետո Վալոնիայի թուրքական կամ մահմեդական համայնքի կողմից ագրեսիա նկատվում է, Դեմոտը հիշեցրեց, որ հարցը քննարկումներ է առաջացրել նաեւ բելգիական խորհրդարանում:
Նա նաեւ նկատեց, որ ընդհանուր առմամբ, բելգիական հասարակությունը մեծ ուշադրություն է հատկացնում Ցեղասպանության հիշատակմանը:
«Ճիշտ է նաեւ այն, որ թուրքական համայնքը բաժանված է ճանաչման մասին տեսակետներով: Բայց ակնհայտ է, որ համայնքի որոշ անդամներ աստիճանաբար իրենք են աշխատանքներ տանում՝ հարցը պարզաբանելու համար: Եվ նրանց հաջողվում է լարված մթնոլորտը դեպի լավը փոխել»,- հավելեց Դեմոտը:
Նշենք, որ Վալոնիայի նախարար-նախագահի գլխավորած պատվիրակությունը Հայաստանում է՝ Ֆրանկոֆոնիայի միջազգային կազմակերպության 31-րդ նախարարական համաժողովին մասնակցելու նպատակով: