Հոկտեմբերի 7–ին Շիրակի մարզպետարանի ներկայացուցիչների հետ նախագահ Սերժ Սարգսյանի անցկացրած խորհրդակցությունն արտառոց չէ։ Այս մասին NEWS.am-ի հետ զրույցում ասաց Շիրակի մարզպետ Ֆելիքս Ցոլակյանը։ Գյումրիի քաղաքապետ Սամվել Բալասանյանի բացակայությունը ըստ մարզպետի` նույնպես նորմալ է` հաշվի առնելով հանդիպման ձևաչափը։
«Ֆորմատն այդ ձեւով էր, մարզպետարանի աշխատակիցներն էին մասնակցում, քանի որ դա մարզպետների հաշվետվություն էր: Արտառոց բան չկա, Սերժ Սարգսյանի նստավայրում մարզպետների հաշվետվություն է, հերթականությամբ ընթանում է, երկու մարզպետի հետ եղել էր, երրորդը մենք էինք»,- ասաց մարզպետը:
Հարցին` արդյոք մարզպետների հետ հանդիպումները առնչվում են դեկտեմբերի 6–ին կայանալիք սահմանադրական փոփոխությունների հանրաքվեի հետ` հաշվի առնելով նաև այն փաստը, որ Սերժ Սարգսյանը հետաքրքրվել է Գյումրիի ոչ կենտրոնական փողոցների վերականգնման աշխատանքների ընթացքով, խոստացել այդ ուղղությամբ հավելյալ ջանքեր ներդնել, մարզպետը վստահեցրեց, որ սահմանադրական փոփոխությունների հանրաքվեի վերաբերյալ որեւէ կարգադրություն չեն ստացել. «Էդ մասին որեւէ խոսակցություն չի եղել»։
Շիրակի մարզպետը գյումրեցիների կողմից հատուկ հակազդեցություն սահմանադրական փոփոխություններին չի զգացել։ Ինչ վերաբերում է փաստին, որ «Ոչ»–ի շարժումն իր առաջին հանրահավաքը անցկացրեց Գյումրիում` պատճառաբանելով, որ Շիրակը Հայաստանի ամենաընդդիմադիր մարզն է, ապա Ֆելիքս Ցոլակյանը ասաց, որ դա սովորական հանրահավաք էր։
Հարցին` մտավախություն չկա՞, որ հանրաքվեին Գյումրին «ոչ» կասի, ինչպես դա եղավ նախագահական ընտրությունների ժամանակ, երբ Սերժ Սարգսյանը Գյումրիում պարտվեց Րաֆֆի Հովհաննիսյանին, մարզպետը պատասխանեց. «Կգա ժամանակը, կիմանանաք, արդյունքները կնայենք` կտեսնենք»:
