Հայաստանի Հանրապետության եւ Լիտվայի Հանրապետության արտաքին գործերի նախարարությունների միջեւ հոկտեմբերի 9-ին կայացան քաղաքական խորհրդակցություններ։
ԱԳՆ մամուլի ծառայությունից NEWS.am-ին հայտնում են, թե հայկական կողմից պատվիրակությունը ղեկավարում էր Հայաստանի արտաքին գործերի նախարարի տեղակալ Կարեն Նազարյանը, լիտվական կողմից` Լիտվայի արտաքին գործերի նախարարի տեղակալ Անդրիուս Կրիվասը:
Խորհրդակցությունների ընթացքում կողմերը քննարկեցին երկկողմ հարաբերությունների զարգացման հեռանկարներն ու նոր հնարավորությունները, այդ թվում` քաղաքական, տնտեսական, մշակութային, գիտակրթական եւ հումանիտար բնագավառներում:
Կողմերը գոհունակություն հայտնեցին վերջին շրջանում երկկողմ հետաքրքրություն ներկայացնող ոլորտներում արձանագրված ակտիվության կապակցությամբ։ Կարեւորվեց փոխգործակցությունը բազմակողմ դիվանագիտության հարթակներում ու միջազգային կազմակերպությունների շրջանակներում, ինչպես նաեւ քաղաքական խորհրդակցությունների պարբերաբար անցկացումն ու բարձրաստիճան փոխայցելությունների իրականացումը:
Կողմերն անդրադարձան նաեւ ՀՀ-ԵՄ հարաբերություններին, ներկա փուլի գերակայություններին եւ համագործակցային հեռանկարներին։
Տեղի ունեցավ մտքերի փոխանակում տարածաշրջանային եւ միջազգային հիմնախնդիրների շուրջ: Քննարկվեցին արցախյան հիմնահարցի կարգավորման գործընթացի հետ կապված վերջին զարգացումները: Փոխնախարար Նազարյանը լիտվական պատվիրակությանը հանգամանալից ներկայացրեց նաեւ ադրբեջանական սադրանքների հետեւանքներն ու ԼՂ հիմնախնդրի խաղաղ կարգավորման վերաբերյալ հայկական կողմի դիրքորոշումները:
