Հայաստանի Հանրապետության Անկախության տոնի առթիվ ՀՀ նախագահ Սերժ Սարգսյանի հրամանով Մարտական ծառայության մեդալով հետմահու պարգևատրվել է 5 տարի առաջ Արցախի զորամասերից մեկում մահացած զինծառայող Արթուր Ղազարյանը: Զինծառայողի մայրը՝ Իրինա Ղազարյանը, ուշացած եւ ոչ տեղին է համարում այս պարգեւը:
«Պաշտպանության նախարարի հետ վերջին հանդիպման ժամանակ ես ասել էի, որ իմ տղան սեւ բերետ է ստացել հետախուզության քննությունից, եւ մինչեւ հիմա իր այդ պարգեւը չեն տվել, եւ պահանջեցի որ այդ պարգեւը թեկուզ հետմահու տան մեզ: Անցավ որոշ ժամանակ ու զինկոմիսարիատից այս պարգեւը բերեցին, որը ոչ մի կապ չունի իմ տղայի ստացած պարգեւի հետ: Չեմ հասկանում՝ ինչու են 5 տարի անց որոշել մարտական ծառայության համար իմ տղային պարգեւատրել»,-ասաց մահացած զինծառայողի մայրը:
Տիկին Իրինան վստահեցնում է, որ 5 տարի անց որդուն տրված պարգեւն իրեն չի սփոփի եւ հանգստացնի, ընդհակառակը՝ այն իրեն ավելի է վրդդովեցնում:
«Նայում եմ այս պարգեւին ու ավելի եմ չարանում, գազազում: Եթե իրենց թվում է, որ այս պարգեւով պետք է սփոփվեմ, ու չպայքարեմ, ապա չարաչար սխալվում են: Ավելի շատ եմ պայքարելու իմ որդու մահվան հանգամանքները պարզելու համար, իմ Արթուրի արյունը էս մետաղի կտորով չեմ փոխի, ինչքան շնչում եմ՝ պիտի պայքարեմ ճշմարտության համար»,-ասաց տիկին Իրինան:
Իրինա Ղազարյանը նշեց, որի ինքն արդեն դիմում է գրել Պաշտպանության նախարար Սեյրան Օհանյանին՝ պահանջելով իր որդու իրական պարգեւը:
«Իրանց լավությունը ինձ պետք չի, իմ երեխեն ինչ վաստակել ա, թող դա ինձ տան»,-ասաց նա:
Նշենք, որ Արթուր Ղազարյանը մահացել է 20102. դեկտեմբերի 17-ին Հադրութի զորամասերից մեկում: Ծնողները չեն ընդունում որդու մահվան պաշտոնական վարկածը, ըստ որի, նրա գլխում չարորակ ուռուցք է հայտնաբերվել: Ծնողները պնդում են, որ իրենց որդին սպանվել է զորամասում տեղի ունեցած միջադեպի պատճառով: Քրեական գործի վարույթը կարճվել է հանցակազմի բացակայության հիմնավորմամբ։