7 մարդու մահվան պատճառ դարձած՝ Գյումրիի վթարի գործով 9 տարվա ազատազրկման դատապարտված, բեռնատարի վարորդ Մանվել Վարդանյանը պատիժը կրում է բաց ռեժիմով: Այս մասին NEWS.am-ի թղթակցի հետ զրույցում ասաց նրա փաստաբան Լիանա Բալյանը:
«Դատարանի որոշումը մտել է օրինական ուժի մեջ: Փոխվել է Մանվել Վարդանյանի պատժի կրման վայրը. նա «Արթիկ» ՔԿՀ-ից տեղափոխվել է «Սեւան» ՔԿՀ, որտեղ պատիժը կրում է բաց ռեժիմով»,- ասաց փաստաբանը:
Նրա խոսքով՝ տուժողները բողոք չեն ներկայացրել, Վարդանյանի դեմ քաղաքացիական հայց չկա:
Հիշեցնենք, որ 2014թ նոյեմբերի 10-ին, «Իմէքս -Գրուպ» ՍՊԸ-ի վարորդ, 45-ամյա Մ.Վարդանյանն «Կամազ-53202» մակնիշի բեռնատար ավտոմեքենայով բախվել էր թիվ 359 «Գազ-32213» մակնիշի ուղևորատար ավտոմեքենային: Վթարի հետևանքով ուղևորատար մեքենան հրդեհվել էր, 7 հոգի մահացել էր, 8-ը՝ տարբեր մարմնական վնասվածքներով տեղափոխվել հիվանդանոց:
Մ.Վարդանյանին մեղադրանք է առաջադրվել ՀՀ ՔՕ 242-րդ հոդվածի 3-րդ մասով՝ ավտոմեքենան վարողի կողմից ճանապարհային երթևեկության կամ տրանսպորտային միջոցների շահագործման կանոնները խախտելը, որը մարդու առողջությանն անզգուշությամբ պատճառել է ծանր կամ միջին ծանրության վնաս: 2015թ. օգոստոսի 11-ին նա դատապարտվել էր 8 տարվա ազատազրկման: