Մեր տարածաշրջանում աշխարհաքաղաքական պատկերի ընկալումն այսօր այլ է, քան տասը օր առաջ: Այս մասին այսօր` հոկտեմբերի 10-ին, լրագրողներին ասաց «Ընդդեմ իրավական կամայականությունների» ՀԿ նախագահ, ՀՀ մարդու իրավունքների նախկին պաշտպան Լարիսա Ալավերդյանը՝ անդրադառնալով ԱՄՆ կոնգրեսականների կողմից հրադադարի ռեժիմի պահպանման առաջարկին:
«Բավական վստահ փոխվել է իրավիճակը: Ես համոզված եմ, որ այս իրավիճակում ԱՄՆ ցույց տվեց, որ եթե ՌԴ-ն մտնում է այն դաշտը, որը պատկանում էր Արևմուտքին՝ ԱՄՆ-ի լիդերությամբ, այնտեղ որտեղ ՌԴ-ն չի կարողանում միանշանակ իրեն դրսևորել, ինչպիսն ԼՂՀ հարցում է, նա է անում ակտիվ քայլեր»,- ասաց Լարիսա Ալավերդյանը:
Նրա կարծիքով` միամիտ է այն մոտեցումը, որ ԱՄՆ-ն միջամտում է իրեն ձեռնտու լինելու պատճառով:
«Այո կան խոշոր խաղացողներ: Մենք պետք է որսանք կամ հասունացնենք պահերը և քաղենք այն օգուտները, որոնք օգուտ են տարածաշրջանում բոլոր ժողովուրդների համար: Մեր նպատակը համապատասխանում է առաջադեմ մարդկության շահերին՝ խաղաղություն, բարեկեցություն, համագործակցություն»,-ասաց նա:
Լարիսա Ալավերդյանը հավելեց, որ այւնուամենայնիվ, պետք է զգուշանալ ԱՄՆ-ի դերակատարության ավելացումից:
«Մենք պետք է հստակ քաղենք դրականը, ինչ կա և գտնենք այն հավասարակշռված բալանսը, որ մեզ չվնասի, հարձակվողական հանդես գալը առնվազն սխալ կլինի»,- ասաց նա: