ԵԱՀԿ Մինսկի խմբի համանախագահները այս ամսվա վերջին կայցելեն տարածաշրջան՝ հանդիպելու Հայաստանի եւ Ադրբեջանի նախագահներին եւ նախապատրաստվելու հաջորդ գագաթնաժողովին։ Այդ մասին հայտնել է ԵԱՀԿ Մինսկի խմբի ամերիկյան համանախագահող Ջեյմս Ուորլիքը, փոխանցում է Trend-ը։
Նրա խոսքով, Լեռնային Ղարաբաղի անկախության ճանաչումը կարող է Ադրբեջանի կողմից վտանգավոր ռազմական պատասխանի հանգեցնել։ «Եվ Հայաստանը, եւ Ադրբեջանը պարտավորվել են քայլեր ձեռնարկել Լեռնային Ղարաբաղի հակամարտության խաղաղ կարգավորման ուղղությամբ։ Մենք հավատացնում ենք, որ շարունակելու ենք կողմերի հետ աշխատել բանակցությունների հիմքի վրա», - ասել է Ուորլիքը։
Նրա խոսքով, տարածաշրջանում լարվածության մակարդակը շատ բարձր է, եւ ԵԱՀԿ Մինսկի խումբը կողմերին կոչ է անում զերծ մնալ այնպիսի քայլերից, որոնք կարող էին նոր լարվածության հանգեցնել։ «Մենք ակնկալում ենք, որ նախագահների հանդիպումը կօգնի առաջ մղել բանակցային գործընթացը եւ իր ներդրումը կունենա անվտանգության ոլորտում իրավիճակի կայունացման գործում», - ասել է նա։