Արցախի սահմանամերձ Մատաղիս եւ Թալիշ համայնքներում զգալի բնական աճ է նկատվում: Այդ մասին ասել է Արցախի վարչապետ Արայիկ Հարությունյանը, որը հոկտեմբերի 9-ին այցելել է սահմանամերձ Մատաղիս եւ Թալիշ համայնքներ եւ հանդիպումներ ունեցել բնակիչների հետ:
Համայնքապետները հակիրճ տվյալներ են ներկայացրել գյուղերի սոցիալ-տնտեսական դրության վերաբերյալ՝ անդրադառնալով վերջին շրջանում կատարված աշխատանքներին ու առկա խնդիրներին: Վարչապետը հետաքրքրվել է գյուղերի ժողովրդագրության եւ ենթակառուցվածքների իրավիճակով՝ ուրախություն հայտնելով, որ զգալի բնական աճ է նկատվում նշյալ համայնքներում:
«Հանրապետության նախագահի հանձնարարականով՝ մոտակա օրերին շահագործման կհանձնվի Մատաղիսի ջրագիծը, իսկ Թալիշի ջրամատակարարման ներքին ցանցի կառուցումը կավարտենք հաջորդ տարի: Հատուկ ուշադրության տակ ենք պահելու այս երկու սահմանամերձ գյուղերի բնակարանաշինության խնդիրները. բնակիչներին աջակցելու ենք եւ՛ շինանյութ տրամադրելով, եւ՛ նոր բնակարաններ կառուցելով: Կքննարկենք նաեւ դպրոցների եւ մանկապարտեզների կառուցման ու վերանորոգման հարցերը եւ կտանք համապատասխան լուծումներ»,- ընդգծել է Ա. Հարությունյանը:
Անդրադառնալով նշյալ համայնքներում գյուղատնտեսական աշխատանքների կազմակերպման հարցերին՝ գործադիրի ղեկավարը շեշտադրել է, որ, հաշվի առնելով Մատաղիսի եւ Թալիշի ռազմավարական նշանակությունը, կառավարությունը խոշոր ծրագրեր է իրականացնում տեղում: