Հայտարարությունները, թե հայկական կողմը կաշառել է Վենետիկի հանձնաժողովի նախագահին՝ դրական եզրակացություն ստանալու համար, մառազմատիկ երեւույթ են: Այս մասին NEWS.am-ի թղթակցի հետ զրույցում ասաց Սահմանադրական դատարանի նախագահ Գագիկ Հարությունյանը:
«Այդ հայտարարությունը ես համարում եմ բացարձակ մառազմատիկ երեւույթ: Կարծում եմ, որ այս հարցերն իրավական հարթության վրա կքննարկվեն: Ամենամեծ կաշառքն այն է, որ մենք ներկայացրել ենք այդքան փայլուն նախագիծ, եւ դրա վերաբերյալ տրվել է այդպիսի կարծիք: Իսկ մնացածը ես հիվանդագին երեւակայության արդյունք եմ համարում, եւ ամենայն հավանականությամբ, դրանք իրավական գործընթացներ կմտնեն եւ կպարզվի, թե ինչու համար են նման բաներ արվում»,- ասաց Գագիկ Հարությունյանը:
Հարցին՝ հնարավոր է հայց ներկայացնեն, ՍԴ նախագահը պատասխանեց. «Խոսքը հայցի մասին չէ, իրավապահ մարմինները պարտավոր են նման դեպքում ձեռնարկել անհրաժեշտ քայլեր»:
Նշենք, որ հոկտեմբերի 9-ին խորհրդարանում կայացած ճեպազրույցում ՀԱԿ խմբակցության ղեկավար Լեւոն Զուրաբյանը հայտարարել էր, թե Հայաստանի հասարակությունը չի աջակցում սահմանադրական փոփոխություններին: «Սահմանադրական փոփոխությունների կողմնակիցները շատ նեղ շրջանակ են. ՀՀԿ-ն՝ Սերժ Սարգսյանի գլխավորությամբ, իր կողմց ստեղծված սահմանադրական հանձնաժողովը՝ Գագիկ Հարությունյանի գլխավորությամբ, որի միակ գործը եղել է կաշառել Վենետիկի հանձնաժողովին (ինքը զբաղվել է այնտեղ լոբբինգով, եւ մենք փաստեր էլ ունենք)»,- ասել էր Զուրաբյանը: