Անկարայի ահաբեկչությունից հետո Գերմանիայի թուրքական համայնքը զգուշանում է բռնության ալիքից։ Իրավիճակը լարված է, իսկ Գերմանիայի Կանաչների կուսակցությունը Եվրամիությանը կոչ է անում զգուշանալ Ռեջեփ Թայիփ Էրդողանից։
Գերմանիայի թուրքական համայնքի ղեկավար Գյոքայ Սոֆուօղլուն Անկարայում տեղի ունեցած պայթյուններից հետո զգուշանում է, որ Գերմանիայում նույնպես կարող են ակտիվանալ թուրք եւ քուրդ ազգայնական տարրերը։ «Թուրքիայում մթնոլորտը շատ լարված է, եւ ես տագնապներ ունեմ, որ այն կարող է լարվել նաեւ այստեղ»,- ասել է նա Kölner Stadt Anzeiger-ի հետ զրույցում։
«Էրդողանի՝ նախագահ դառնալուց հետո, Գերմանիայում ծայր է առել այս բեւեռացումը»,- նշել է է նա։
Միաժամանակ Թուրքիայում իրադարձությունների զարգացումների շուրջ բացասական կանխատեսումներ է արել Բունդեսթագի Կանաչների միության նախագահ Ջեմ Օզդեմիրը։ Նա Էրդողանին մեղադրել է իրավիճակը լարելու մեջ։ «Ակնհայտ է, որ Էրդողանն անում է հնարավոր ամեն բան կանոնակարգված եւ արդար ընտրություններին խոչընդոտելու համար։ Եթե նոյեմբերի 1-ին ժողովրդավարական, ազատ ընտրություններ լինեն, Էրդողանը նորից մեծամասնություն չի հավաքի, եւ նա դա գիտի»,- ասել է Օզդեմիրը եւ կոչ արել սառեցնել ԵՄ-ի եւ Էրդողանի միջեւ բանակցությունները։
«Մենք չպետք է մինչեւ նոյեմբերի 1-ը որեւէ բան անենք։ Էրդողանի հետ յուրաքանչյուր համաձայնագիր կլինի ազդակ առ այն, որ նա մեզ համար բանակցություններ վարելու ընդունելի գործընկեր է։ Մինչդեռ նա, ով իր քաղաքացիների, ոստիկանների եւ զինվորների մահը սակարկության առարկա է դարձնում, չի կարող պետության ղեկավար համարվել»,- ասել է Օզդեմիրը։
Հիշեցնենք, որ Թուրքիայի մայրաքաղաքում հոկտեմբերի 10-ի առավոտյան Խաղաղության հանրահավաքի ժամանակ տեղի ունեցած հզոր պայթյունների հետեւանքով զոհվել է 97 քաղաքացի։