«Օրրան» բարեգործական հասարակական կազմակերպության 10-րդ ամենամյա բարեգործական ընթրիքի ընթացքում, որը տեղի է ունեցել Երեւանում հոկտեմբերի 10-ին, ընդհանուր առմամբ հավաքվել է 74 մլն դրամ, որից 50 մլն դրամը նվիրաբերել է ՎիվաՍել-ՄՏՍ-ը, եւ եւս 2 840 000 դրամ` Յիրիկյանների ընտանիքը:
ՎիվաՍել-ՄՏՍ-ից հայտնում են, որ միջոցառման նպատակն էր դրամական միջոցներ հայթայթել՝ Երեւանի եւ Վանաձորի կենտրոններ այցելող շուրջ 200 կարիքավոր երեխայի եւ միայնակ ավելի քան 90 տարեցի սննդի, կրթական, սոցիալական, հոգեբանական, բժշկական, մշակութային համալիր ծառայություններ մատուցելու համար:
Այս տարվա ընթրիքը եղել է հոբելյանական. լրացել է «Օրրանի» գործունեության 15-ամյակը: Բարեգործական ճաշին մասնակցել են «Օրրանի»՝ տարբեր երկրներից ժամանած եւ հայաստանաբնակ բարեկամները: Հետաքրքիր ժամանցային ծրագրով հագեցած երեկոյի ընթացքում մատուցվել են տարբեր ազգերի խոհանոցների խորտիկներ, կազմակերպվել են ավանդական դարձած կենդանի աճուրդ եւ բարեգործական վիճակախաղ:
Ամեն տարի ՎիվաՍել-ՄՏՍ-ն իր զգալի ներդրումն է ունենում ընթրիքի նպատակի իրագործման հարցում: 2006 թվականից մինչ այժմ ընկերությունն «Օրրանի» ծրագրերի իրականացման նպատակով կատարել է ավելի քան 331 միլիոն ՀՀ դրամի ներդրում:
«Ողջունում եմ իր առջեւ չափազանց բարդ խնդիր դրած եւ համարձակ լուծումներ առաջարկող այս կազմակերպության նախաձեռնությունները, որոնց նպատակն է Հայաստանում խոցելի խմբերի երեխաներին եւ տարեցներին մշտապես հոգածության կենտրոնում պահելը»,-ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
