News Media հոլդինգի ղեկավար Արամ Գաբրելյանովը որոշել է Սանկտ Պետերբուրգում իր ընկերությանը պատկանող երեք թերթ փակել. «Նեւսկոյե վրեմյա»-ն, «Սմենա»-ն եւ «Վեչերնի Պետերբուրգ»-ը: «Կոմերսանտ»-ի փոխանցմամբ, քաղաքային իշխանությունները Գաբրելյանովին առաջարկել են իրենց վաճառել թերթերը կամ դրանք ֆինանսավորել քաղաքային բյուջեից, սակայն News Media-ի ղեկավարը չի պատասխանել առաջարկին:
Ընդհանուր առմամբ, խմբագրություններից շուրջ 100 աշխատակից է հեռացվել:
«Մենք միայն տպագիր տարբերակն ենք փակում: Տպաքանակը մեծ չէր: Առցանց տարբերակները կշարունակեն աշխատել, կհետեւենք դրանց ցուցանիշներին, տեսնենք, թե ուր են շարժվում, ինչ ուղղությամբ, արդյոք որեւէ հեռանկար կա, լսարան ունեն: Դատելով ցուցանիշներից, որոնք ես տեսել եմ, դրանք չնչին են: Դա բիզնես չէր, այլ բարեգործության նման մի բան: Ես այնտեղ գնացել եմ բիզնեսով զբաղվելու: Իմ գործը բրենդները պահպանելը չէ: Դարավոր, 100-ամյա, 200-ամյա... ինձ համար տարբերություն չկա: Ես պետք է բիզնես անեմ»,- իր որոշումն այսպես է պարզաբանել մեդիամագնատը:
Gazeta-ի փոխանցմամբ, ավելի վաղ Գաբրելյանովը զանգվածային կրճատումներ էր կատարել «100 TV» հեռուստաալիքում, որտեղ, նրա խոսքով, աշխատում էին «ծույլեր, որոնք հպարտանում էին իրենց ծուլությամբ»:
