«Դովլաթովի 5 անկյունները» վավերագրական նոր ֆիլմը տարբերվում է Դովլաթովի մասին նկարահանված մյուս բոլոր ֆիլմերից: Այն յուրահատուկ, բոլորովին նոր մոտեցում ունի: NEWS.am-ի թղթակցի հետ զրույցում այսպիսի կարծիք հայտնեց գրողի կինը՝ Ելենա Դովլաթովան:
«Ֆիլմը ոչ միայն արդարացրեց, այլեւ գերազանցեց իմ սպասելիքները: Այն առաջին հերթին տարբերվում է յուրահատուկ մոտեցմամբ»,- խոստովանեց Ելենա Դովլաթովան:
Նրա խոսքով, Դովլաթովի մասին նախորդ ֆիլմերի հեղինակներն ավելի շատ ձգտել են ներկայացնել գրողի կենսագրությունն ու քննարկման դնել բազմաթիվ անձնական հարցեր: Իսկ այս ֆիլմում հեղինակներն այլ կերպ են վարվել. նրանք խոսել են գրականության մասին, հանրության, պատմության մեջ մարդու տեղի մասին: Ավելին, հեղինակները՝ Ազա Բաբայանը եւ Վադիմ Դուբնովը, ձգտել են առավելագույնս հավաստի վերստեղծել այն ժամանակաշրջանն ու միջավայրը, որում ապրել եւ ստեղծագործել է գրողը, նրան լավագույնս հասկանալու համար:
Գրողի դուստրը՝ Կատերինա Դովլաթովան էլ ընդգծեց, որ իր համար հոր ստեղծագործությունները նրա հետ զրույցի շարունակությունն են: «Շատերն են կորցրել իրենց ծնողներին: Բայց ես կարծում եմ, որ իմ բախտը բերել է, քանի որ հայրս այնպիսի հրաշալի գրքեր է թողել, որոնք ինձ թույլ են տալիս շարունակել զրուցել նրա հետ, ճանաչել նրան»,- ասաց նա:
Հիշեցնենք, որ հոկտեմբերի 12-ին Երեւանում կայացավ Ազա Բաբայանի եւ Վադիմ Դուբնովի «Դովլաթովի 5 անկյունները» վավերագրական ֆիլմի փակ ցուցադրությունը: Ժապավենը ստեղծվել է Հայաստանի մշակույթի նախարարության եւ Ազգային կինոկենտրոնի աջակցությամբ:
