Եվրամիությունը, ԱՄՆ-ն եւ Ռուսաստանը շփման եզրեր ունեն Սիրիայում. դա ՄԱԿ-ի Անվտանգության խորհրդի բանաձեւն է: Լյուքսեմբուրգում կայացած Եվրամիության ԱԳ նախարարների հանդիպումից հետո հայտարարել է ԵՄ արտաքին գործերի եւ անվտանգության քաղաքականության գերագույն հանձնակատար Ֆեդերիկա Մոգերինին:
«Սիրիայում Ռուսաստանի միջամտությունը, անկասկած, փոխում է խաղի կանոնները, այն բազմաթիվ անհանգստացնող տարրեր է պարունակում: Մենք կքննարկենք այդ տարրերը, մասնավորապես, Թուրքիայի օդային տարածքը խախտելու վերաբերյալ»,- ասել է Ֆեդերիկա Մոգերինին:
ԵՄ պաշտոնական կայքի փոխանցմամբ, երբ խոսվում է «ՄԱԿ-ի աջակցության» մասին, նաեւ նկատի է առնվում, որ այդ աջակցությունը վերաբերում է գործընթացում ներգրավված բոլոր խաղացողներին:
«ՄԱԿ-ը ջանքեր է գործադրում: Եվ մենք բոլորս դիվանագիտական ջանքեր ենք գործադրում՝ դրան աջակցելու համար: Անցման արդյունքը կորոշվի միջազգային հանրության, տարածաշրջանային խաղացողների, բայց, ամենակարեւորը, Սիրիայի ամբողջ բնակչության հետ միասին»,- հավելել է Մոգերինին: