Երեւանում ընթացող սահմանադրական փոփոխությունների քննարկման ժամանակ «Ոչ»-ի ճակատն իր լուռ բողոքն է հայտնել սպասվելիք փոփոխությունների կապակցությամբ։ Քննարկումը տեղի է ունենում «Անի» հյուրանոցում։ Բացման խոսքով հյուրերին եւ մասնակիցներին դիմել է Ֆրիդրիխ Էբերտի հիմնադրամի Հարավային Կովկասի հարցերով համակարգող Յուլյա Բլեզիուսը։

Նրա խոսքով՝ հիմնադրամն արդեն 20 տարի է՝ գործում է Հայաստանում։ Նրա հետաքրքրությունների ոլորտը ժողովրդավարությանը վերաբերող հարցերն են։  «Փորձում ենք բարձրացնել քաղաքական հարցերի քննարկման մշակույթը։ Սահմանադրությունը քաղաքական  կառուցվածքի սիրտն է։ Եթե այն գործում է խոտանով, ողջ համակարգն է տուժում»,- նշել է նա։ Բլեզիուսը հիշեցրել է, որ քննարկումներ են տեղի ունեցել նախքան խորհրդարանի կողմից նախագիծը ընդունելը։ «Հիմնադրամը ո՛չ աջակցում եւ ո՛չ էլ դեմ է արտահայտվում սահմանադրական փոփոխություններին։ Մեզ համար կարեւոր է կառուցողական քննարկումը»,- ասել է հիմնադրամի ներկայացուցիչը։

ՀՀ նախագահին կից Սահմանադրական բարեփոխումների հայեցակարգը մշակող փորձագիտական հանձնաժողովի անդամ Վարդան Պողսյանը հակիրճ ներկայացրել է փոփոխությունների հիմնական ուղղությունները՝ նշելով, որ դրանք թույլ կտան ընդլայնել մարդու իրավունքները, կամրապնդեն գործող ինստիտուտները, որոշումներ կայացնելիս կկրճատեն մարդկային գործոնն ու կհակազդեն կողմնակալությանը։

Նշենք, որ քննարկմանը ներկա են նաեւ «Ոչ»-ի ճակատի ներկայացուցիչները։ Երիտասարդները ձեռքերում բռնել են «Ոչ» գրառումով պաստառներ՝ դրանով իրենց լուռ բողոքը հայտնելով սահմանադրական փոփոխություններին։