Սահմանադրական գործընթացը ոչ թե տեքստերի ընտրություն է, այլ քաղաքական գործընթաց։ Այս մասին «Անի» հյուրանոցում ընթացող սահմանադրական փոփոխությունների քննարկման ժամանակ ասաց ՀԱԿ խորհրդարանական խմբակցության անդամ Լեւոն Զուրաբյանը։ Անդրադառնալով հարցին, թե ինչի՞ համար են առհասարակ Հայաստանին պետք սահմանադրական փոփոխություններն ու կառավարման համակարգի փոփոխումը՝ Զուրաբյանը նշեց, որ ոչ մի կայացած պետություն նման քայլեր չի ձեռնարկում։
«Դրանք խաղի սուրբ կանոններն են, որոնց պետք է ենթարկվի քաղաքական վերնախավը։ Հենց որ խաղի կանոնները վերածվում են խաղալիքի, Սահմանադրությունը դադարում է կարեւոր փաստաթղթի դեր կատարել»,- ասաց Զուրաբյանը։
Նրա խոսքով՝ նախագահ Սերժ Սարգսյանը միշտ կիսանախագահական համակարգի կողմնակից է եղել՝ գնահատելով իրողություններն ու սպառնալիքները։ «Ի՞նչ պատահեց, որ նա, լինելով այդ կառուցվածքի կողմնակիցը, նախագահության երկրորդ շրջանում որոշեց փոխել կառավարման համակարգը։ Հատկապես որ Վենետիկի հանձնաժողովը գտնում է, որ կառավարման երեք ձեւերի միջեւ ժողովրդավարության ապահովման առումով էական տարբերություն չկա»,- նշեց նա։
Ինչ վերաբերում է խորհրդարանում քվեարկության արդյունքներին եւ քաղաքական համոզմունքներին, ապա Զուրաբյանի կարծիքով, դա որպես փոխզիջում ներկայացնելը կեղծավորություն է։
Լեւոն Զուրաբյանի կարծիքով անցյալ տարվա ցույցերը Սերժ Սարգսյանին ստիպեցին մտածել լուրջ սպառնալիքների մասին, դրանցով էլ պայմանավորված է կառավարման համակարգը փոփոխելու ձգտումը։
ԲՀԿ-ում տեղի ունեցած փոփոխությունները, ըստ Զուրաբյանի, նույնպես պայմանավորված են սահմանադրական փոփոխություններով։ «Դրա միջոցով հնարավոր եղավ հասնել այսպես կոչված փոխզիջման»,- պարզաբանեց պատգամավորը՝ վստահեցնելով, որ փոփոխություններն ուղղված են Սերժ Սարգսյանի կառավարումը հավերժացնելուն։