Հոկտեմբերի 9-ին Երեւանի Արշակունյաց պողոտայում գտնվող «Փեթակ» հյուրանոցում հայտնաբերված 57-ամյա Գագիկ Ա.-ի դիակի վրա արտաքին զննությամբ բռնության հետքեր չեն եղել: Այս մասին NEWS.am-ին տեղեկացրին ՀՀ Քննչական կոմիտեի մամուլի ծառայությունից:
Օրեր անց պատրաստ կլինի նշանակված դատաբժշկական փորձաքննության եզրակացությունը, որը կպարզի՝ տղամարդու մահն ինչի հետեւանքով է վրա հասել:
Քննչական կոմիտեից հայտնեցին, որ քննիչները դեռեւս որեւէ վարկած չունեն՝ արդյոք սպանություն, թե ինքնասպանություն է եղել:
Քննչական կոմիտեում դեպքի առթիվ նյութեր են նախապատրաստվել: Հետաքննությունը շարունակվում է:
Ավելի վաղ տեղեկացրել էինք, որ Երեւանի Արշակունյաց պողոտայում գտնվող «Փեթակ» հյուրանոցում հոկտեմբերի 9-ին դիակ է հայտնաբերվել: NEWS.am-ի տեղեկություններով` աշխատակիցը մուտք գործելով հյուրանոցի սենյակներից մեկը, նկատել է, որ հյուրանոցի այցելուն անշարժ ընկած է հատակին:
Դեպքի վայր են ժամանել ոստիկաններ:
Հայտնաբերվածը 57–ամյա տղամարդ է, որի մահվան հանգամանքները դեռ պարզ չեն։ Նշանակվել է դատաբժշկական փորձաքննություն, կատարվում է քննություն: